ပို့လဘား၊ ဖေဖော်ဝါရီ ၁၉ ရက်၊ မူဆယ်
စစ်ကောင်စီ ထိန်းချုပ်ထားတဲ့ တရုတ်-မြန်မာနယ်စပ်ဖြစ်တဲ့ ရှမ်းမြောက် မူဆယ်မြို့ ဟိုနားရပ်ကွက်မှာရှိတဲ့ ရွှေစင်မင်း KTV လမ်းကြားမှာ သေဆုံးနေတဲ့ အမျိုးသားအလောင်း တွေ့ရှိခဲ့တယ်လို့ လက်ဖက်ညွန့် လူမှုကူညီရေးအသင်းတစ်ဦးက ပြောပါတယ်။
မနေ့ ဖေဖော်ဝါရီ ၁၈ ရက် မနက်အစောပိုင်း ၂ နာရီဝန်းကျင်မှာ အဲဒီအမျိုးသားက ဟိုနားရပ်ကွက်မှာရှိတဲ့ နေအိမ်တစ်အိမ်ကပစ္စည်း ဝင်ခိုးရာ အိမ်ပေါ်ကနေ ပြုတ်ကျပြီး သေဆုံးခဲ့တာပါ။
“သူက ဘိန်းစားသမားပေါ့နော်။ သူ ခဏခဏ ခိုးနေတာပဲတဲ့။ အဲအိမ်မှာရှိတဲ့ ဆိုင်ကယ်တွေရော ရေခဲသေတ္တာတွေရော သူခိုးနေတာ။ အဲအိမ်မှာတော့ လူနေတာ မရှိဘူး။ မနေ့ညက သူပြုတ်ကျလို့ ထင်တယ်။ ရာသီဉတုက အေးတယ်ဆိုတော့။ သူကမီတာဘောက် ဝင်ခိုးတာပေါ့။ အိမ်နီးချင်းက အသံကြားတော့ ထတယ်ဆိုတဲ့သဘောနဲ့။ သူကအလန့်တကြားနဲ့ အပေါ်ပြန်တက်တဲ့အချိန်မှာ အဲဒီမီတာဘောက်နဲ့ အုတ်တံတိုင်းကြားမှာ ပြုတ်ကျတာ။ သူများမသိလိုက်ဘူး။ အဲမှာပဲ သူအအေးပတ်ပြီး သေသွားတာ ဖြစ်နိုင်တယ်။ ဒီမနက်ကျ ဟိုနားရပ်ကွက် နယ်မြေမှူးက ကျနော်တို့ဆီ ဖုန်းဆက် အကူအညီ တောင်းလာတာ”
သေဆုံးသူ ပိုင်ရှင်မဲ့ အမျိုးသားအလောင်းကို လက်ဖက်ညွန့် လူမှုကူညီရေးအသင်းနဲ့ မြင်မြတ်ပါရမီအသင်းက သွားရောက် ကူညီဆောင်ရွက်ပေးခဲ့တယ်လို့ ဆိုပါတယ်။
မူဆယ်မြို့မှာ မူးယစ်ဆေး သုံးစွဲရင်း လမ်းဘေးမှာ သေဆုံးသွားတဲ့ ပိုင်ရှင်မဲ့အလောင်းတွေ မကြာခဏ တွေ့ရှိနေတဲ့မြို့လည်း ဖြစ်ပါတယ်။
စစ်တပ် အာဏာသိမ်းပြီးနောက်ပိုင်း မူဆယ်မြို့မှာ အရင်ကထက် မူးယစ်ဆေးဝါးနဲ့ လောင်းကစားဝိုင်း ပိုများလာပြီး ခိုးမှု၊ လုယက်မှုနဲ့ ဓားပြတိုက်မှုလည်း မကြာခဏ ဖြစ်ပွားနေပါတယ်။
