မြတ်နိုး၊ ဖေဖော်ဝါရီ ၁၈ ရက်၊ ဗန်းမော်
ကချင်ပြည်နယ် ဗန်းမော်မှာ စစ်ကောင်စီတပ်နဲ့ ကချင်တပ်- KIA ပူးပေါင်းတပ်ဖွဲ့တို့အကြား ဒီနေ့ ဖေဖော်ဝါရီ ၁၈ ရက်အထိ တိုက်ပွဲ ဆက်လက် ပြင်းထန်နေဆဲဖြစ်ကြောင်း ဒေသခံအပြင် ရှေ့တန်းနဲ့ နီးစပ်သူတွေဆီက သိရပါတယ်။
“ဒီမနက် အစောပိုင်းကတည်းက ဗန်းမော်မှာ တိုက်ပွဲ တော်တော် ပြန်ပြင်းထန်နေတယ်။ လေယာဉ်ဗုံးကြဲသံတွေ တရုတ် နယ်စပ်ဘက်ထိတောင် နေအိမ်တွေ တုန်ခါနေတယ်။ အသံတွေ ကြားပြီး အလုပ်တောင် မလုပ်တတ်တော့ဘူး” လို့ ဒေသခံ အမျိုးသမီးတစ်ဦးက ပြောပါတယ်။
ဒီနေ့မနက်ပိုင်းမှာ လေယာဉ်နဲ့ ဗုံးလာကြဲတာ ၁၁ စီးလောက် ရှိသွားပြီလို့ သူက ပြောပါတယ်။
“မနေ့က စစ်ကောင်စီဘက်က ဒရုန်း ၂ စီးကို ပစ်ချလိုက်နိုင်တယ်။ အဲဒါကြောင့် ဒီနေ့ လေယာဉ်နဲ့ တရစပ် ဗုံးကြဲနေတာလား မသိဘူး” လို့ KIA ရှေ့တန်းနဲ့ နီးစပ်သူတစ်ဦးက ပြောပါတယ်။
ဒီနေ့မှာတော့ ဗန်းမော်မြို့ရဲ့ နေရာ ၃ နေရာခန့်မှာ တိုက်ပွဲ ပြင်းထန်နေပြီး မနေ့က စစ်တပ်ရဲ့ ဒရုန်းကို လက်နက်အသေး KA 2.5 နဲ့ ပစ်ချနိုင်ခဲ့တာလို့ ဆိုပါတယ်။
ပြီးခဲ့တဲ့ ၂၀၂၄ ဒီဇင်ဘာ ၄ ရက်က စဗန်းမော်မြို့ကို KIA နဲ့ ပူးပေါင်းတပ်ဖွဲ့က စတင်ထိုးစစ်ဆင် တိုက်ခိုက်နေတာဖြစ်ပြီး နှစ်ဖက်အထိအခိုက် အကျအဆုံး များနေပေမဲ့ မြေပြင်အချက်အလက်ကတော့ မသိရသေးပါဘူး။
