မိုင်းရူပ၊ ဖေဖော်ဝါရီ ၁၇ ရက်၊ နမ္မတူ
တရုတ်ရဲ့ ကြားဝင်စေ့စပ်မှုနဲ့ တရုတ်နိုင်ငံ ကူမင်းမြို့မှာ စစ်ကောင်စီနဲ့ တအာင်းတပ်မတော်- PSLF/TNLA တို့ စစ်ရေးအရှိန် လျှော့ချရေး ဆွေးနွေးနေချိန် TNLA ထိန်းချုပ်ထားတဲ့ နမ္မတူ-ကွတ်ခိုင်မြို့နယ်အစပ် အနီးတစ်ဝိုက်ကို စစ်တပ်က လေကြောင်းကနေ ဗုံးကြဲတိုက်ခိုက်နေပါတယ်။
ဒီနေ့ ဖေဖော်ဝါရီ ၁၇ ရက် ည ၈ နာရီခွဲဝန်းကျင်မှာ ဂျက်လေယာဥ်နဲ့ TNLA ထိန်းချုပ်ထားတဲ့ နမ္မတူ-ကွတ်ခိုင်မြို့နယ်အစပ်ရှိ ကျေးရွာတွေကို ဗုံးကြဲတိုက်ခိုက်ခဲ့တာ ဖြစ်ပါတယ်။
“ဂျက်လေယာဥ်နဲ့ လာကြဲသွားတာ။ နမ္မတူ-ကွတ်ခိုင်အစပ်မှာ လာကြဲတာ။ ထိခိုက်မှုတော့ မသိရသေးဘူး” ဆိုပြီး စစ်ရေးအခြေအနေ သိရှိသူတစ်ဦးက ရွှေဖီမြေကို ပြောပါတယ်။
အခုလို ဗုံးကြဲတိုက်ခိုက်တာဟာ စစ်တပ်က TNLA ကို ဖိအားပေးတာ ဖြစ်နိုင်ပြီး လူထုတွေအနေနဲ့ သတိနဲ့နေထိုင်ကြဖို့ လိုအပ်တယ်လို့ စစ်ရေးအခြေအနေ သိရှိသူတွေက တိုက်တွန်းထားပါတယ်။
ကိုးကန့်တပ်မတော်- MNDAA နဲ့ သဘောတူညီမှု ရရှိထားတဲ့ စစ်ကောင်စီက အပေါ်စီးကနေ ဆွေးနွေးမယ့်သဘော ဆောင်ပြီး နောင်ချိုမြို့နယ် တောင်းခမ်း၊ မန္တလေးတိုင်း သပိတ်ကျင်းမြို့နယ်မှာ ထိုးစစ်တွေ ပိုလုပ်လာပြီး လေကြောင်း ပိုမိုအသုံးပြုကာ တိုက်ခိုက်နေတယ်လို့ PSLF/TNLA ရဲ့ အထွေထွေ အတွင်းရေးမှူး ဗိုလ်ချုပ် တားဘုန်းကျော်က ၎င်းရဲ့ လူမှုကွန်ရက်စာမျက်နှာမှာ ရေးသားထားပါတယ်။
