ရွှေဖီမြေ၊ ဖေဖော်ဝါရီ ၁၆ ရက်၊ နောင်ချို
တရုတ်နိုင်ငံ ကူမင်းမြို့မှာ TNLA က ဆွေးနွေးပွဲ သွားနေချိန် စစ်ကောင်စီတပ်က TNLA ထိန်းချုပ်ထားတဲ့ နယ်မြေကို လက်နက်ကြီးနဲ့ လေကြောင်း ၁၇၅ လုံး ပစ်ခတ်တိုက်ခိုက်ခဲ့တယ်လို့ မနေ့ ဖေဖော်ဝါရီ ၁၅ ရက်မှာ TNLA က ထုတ်ပြန်ထားပါတယ်။
နောင်ချိုမြို့နယ်မှာ တိုက်ပွဲ ဖြစ်ပွားတာ မရှိဘဲ စစ်တပ်က လေကြောင်းနဲ့ လက်နက်ကြီးအသုံးပြုပြီး ပစ်ခတ်တိုက်ခိုက်ခဲ့တယ်လို့လည်း ဆိုပါတယ်။
တောင်းခမ်းရှိ စစ်ကောင်စီ ခမရ ၄၀၆၊ တပ်ရင်း ၃၅၄ နဲ့ တပ်ရင်း ၉၀၂ ကနေ နာဆွေ၊ အုမ္မတီး၊ ညောင်နီနဲ့ တောင်ရွှေရွာဘက် လက်နက်ကြီး ၁၃၇ လုံး ပစ်ခတ်ခဲ့တဲ့အပြင် နေ့လယ် ၂ နာရီခန့်မှာလည်း Y-12 လေယာဥ်နဲ့ နာဆွေရွာထဲ ဗုံး ၃၈ လုံး လာရောက် ကြဲချ တိုက်ခိုက်ခဲ့တာ ဖြစ်ပါတယ်။
ဗုံးကြဲတာနဲ့ လက်နက်ကြီး ပစ်ခတ် တိုက်ခိုက်မှုကြောင့် အရပ်သား ထိခိုက်သေဆုံးမှုကို သိရှိနိုင်ဖို့ နောင်ချိုမြို့နယ်ရှိ ဒေသခံလူထုတွေကို ဆက်သွယ်ဖို့ ကြိုးစားနေဆဲ ဖြစ်တာကြောင့် ထိခိုက်သေဆုံးမှု အသေးစိတ်ကို မသိရသေးပါဘူး။
ဒုဗိုလ်ချုပ်ကြီး တားဂျုတ်ဂျား ဦးဆောင်တဲ့ PSLF/TNLA ရဲ့ ကိုယ်စားလှယ်အဖွဲ့ဟာ ဒုဗိုလ်ချုပ်ကြီး ကိုကိုဦး ဦးဆောင်တဲ့ စစ်ကောင်စီ ကိုယ်စားလှယ်အဖွဲ့နဲ့ ဒီနေ့ ဖေဖော်ဝါရီ ၁၆ ရက် ကူမင်းမြို့မှာ တွေ့ဆုံကာ စတင် ဆွေးနွေးနေပြီဖြစ်ကြောင်း သိရပါတယ်။
