လွေးထွေး၊ ဖေဖော်ဝါရီ ၁၆ ရက်၊ မူဆယ်
စစ်ကောင်စီ ထိန်းချုပ်ထားတဲ့ မူဆယ်မြို့မှာ စစ်တပ်က တရုတ်ပြည်ထဲဝင်ဖို့သွားတဲ့ အမျိုးသားတစ်ဦးကို ဖမ်းဆီးပြီး ငွေ ၃ သိန်း တောင်းယူခဲ့တယ်လို့ ကိုယ်တိုင် ကြုံခဲ့ရသူ အမျိုးသားနဲ့ နီးစပ်သူတစ်ဦးက ပြောပါတယ်။
မနေ့ ဖေဖာ်ဝါရီ ၁၅ ရက် နမ့်ခမ်းမြို့နယ်က အမျိုးသားတစ်ဦးဟာ တရုတ်ပြည်ထဲဝင်ဖို့သွားချိန် တရုတ်ရဲက ၎င်းအမျိုးသားကို ဆီးစစ်ချိန် ဆီးအောင်တာကြောင့် မြန်မာဘက် ပြန်ပို့ရာ စစ်တပ်က ၎င်းအမျိုးသားကို မျက်နှာပိတ်ပြီး ဖမ်းဆီးခေါ်ဆောင်သွားခဲ့တာ ဖြစ်ပါတယ်။
၎င်းအမျိုးသားနဲ့ နီးစပ်သူ အမျိုးသမီးက “သူ့ကို ကောင်းကောင်း ပြန်ပို့လို့ရတာကို အခုက မျက်နှာပိတ် ခေါ်သွားတာ။ ပိုက်ဆံလည်း မရမက တောင်းသေးတယ်။ အခုတော့ ပြန်လွှတ်လာပြီ။ နောက်လူတွေ ထပ်မကြုံရအောင် သတိနဲ့ သွားလာကြဖို့ပါ” လို့ ပြောပါတယ်။
စစ်တပ်ဟာ အသက် ၂၀ ဝန်းကျင်အရွယ် ၎င်းအမျိုးသားကို တစ်ည ဖမ်းဆီးခဲ့ပြီး ငွေတောင်းခဲ့ပေမဲ့ ဖမ်းဆီးခံရသူ အမျိုးသားဟာ ငွေ ၃ သိန်း မပေးနိုင်တာကြောင့် ပါလာတဲ့ ဆေးလိပ်တစ်ဘူးနဲ့ တရုတ်ငွေ ယွမ် ၁၀၀ သာ ပေးခဲ့ကြောင်း သူမက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ၁၂ ရက်ကလည်း တရုတ်နိုင်ငံဘက် အလုပ်လုပ်ဖို့ သွားကြမယ့် အသက် ၂၇ နှစ်အောက် အမျိုးသမီးနဲ့ ၃၅ နှစ်အောက် အမျိုးသားကို မူဆယ်ဘက်ခြမ်းမှာ စစ်ကောင်စီက ထွက်ခွာခွင့် ကန့်သတ်ခဲ့ပြီး စစ်မှုထမ်းစရာ မလိုကြောင်း သက်ဆိုင်ရာ ထောက်ခံစာပါမှ သွားခွင့်ပြုတယ်လို့ ဒေသခံတွေက ပြောပါတယ်။
မူဆယ်မြို့မှာ စစ်တပ်က မကြာခဏ အရပ်သားကို စစ်ဆေးဖမ်းဆီးပြီး ငွေတောင်းတဲ့ဖြစ်စဉ်လည်း ဖြစ်ပွားနေသလို ပြည်သူ့စစ်ပေါင်းစုံ ရှိနေတာကြောင့် ဒေသခံတွေ ပြန်ပေးဆွဲခံရတဲ့ဖြစ်စဉ်လည်း မကြာခဏ ဖြစ်ပွားနေပါတယ်။
