ပျားကြီး၊ ဖေဖော်ဝါရီ ၁၃ ရက်၊ မုံရွာ
စစ်ကိုင်းတိုင်း မုံရွာ၊ ချောင်းဦးနဲ့ ကနီမြို့နယ်မှာ စစ်ကောင်စီတပ်က လေကြောင်းတိုက်ခိုက်မှု ဆက်တိုက် ပြုလုပ်နေတာကြောင့် ကလေးသူငယ်အပါအဝင် အရပ်သား သေဆုံးမှု ရှိနေတယ်လို့ ဒေသခံတွေက ပြောပါတယ်။
မနေ့ ဖေဖော်ဝါရီ ၁၂ ရက် ပြည်ထောင်စုနေ့ မနက်ပိုင်းက ကနီနဲ့ ညပိုင်းမှာ မုံရွာနဲ့ချောင်းဦးမြို့နယ်ကို Y12 လေယာဥ် အသုံးပြုပြီး ဗုံးကြဲမှုနဲ့ စက်သေနတ် ပစ်ခတ်မှု ပြုလုပ်ခဲ့တာ ဖြစ်ပါတယ်။
“ချောင်းဦးဖက်က ပိုထိတယ်ဗျ။ စစ်ရှောင်စခန်းနား ကျတာဆိုတော့ ကလေးတွေပါ သေတယ်။ မုံရွာဖက်ခြမ်းလည်း သေတယ်။ ဒဏ်ရာရတဲ့သူတွေလည်း မနည်းမနောပဲ။ ၂၀ ကျော် ၃၀ လောက် ရှိမယ်” လို့ မုံရွာဒေသခံတစ်ဦးက ပြောပါတယ်။
မနေ့ည ၁၀ နာရီဝန်းကျင်ကနေ မနက် ၆ နာရီခန့်အထိ လုပ်ခဲ့တဲ့ လေကြောင်းတိုက်ခိုက်မှုကြောင့် မုံရွာမြို့နယ်ထဲက သစ်ဆိမ့်နဲ့ညောင်ဖြူပင်ရွာ၊ ချောင်းဦးမြို့နယ်ထဲက ကုလားကြီးရွာ စစ်ရှောင်စခန်းမှာရှိတဲ့ ကလေး ၂ ဦးအပါအဝင် အရပ်သား ၇ ဦးထက်မနည်း သေဆုံးခဲ့တယ်လို့ ဒေသခံတွေက ဆိုပါတယ်။
ကနီမြို့နယ်ထဲက နတ်ကြီး၊ မုဌောနဲ့ ဝါးချောင်းလေးရွာမှာ မနေ့မနက်ပိုင်းက Y12 လေယာဥ်နဲ့ ဗုံးအလုံးပေါင်း ၂၀ ကျော် ကြဲချခဲ့တာကြောင့် လူ ၃ ဦး ထိခိုက်ဒဏ်ရာ ရရှိခဲ့တယ်လို့ ကနီဒေသခံတွေက ပြောပါတယ်။
စစ်ကောင်စီဟာ အနောက်မြောက်တိုင်းစစ်ဌာနချုပ်အခြေစိုက်တဲ့ မုံရွာအနီးဝန်းကျင်ဒေသကို ဒီရက်ပိုင်းအတွင်း စက်တပ်လေထီး (Paramoter)အပါအဝင် လေကြောင်းတိုက်ခိုက်မှု ဆက်တိုက် ပြုလုပ်လာတာကြောင့် ဒေသခံတွေ ထိခိုက်သေဆုံးမှု ရှိနေပါတယ်။
