ယာရူစိင်၊ ဖေဖော်ဝါရီ ၁၂ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ နမ့်ဖတ်ကာ ပြည်သူ့စစ်က ပစ်ခတ်လို့ သေဆုံးသွားတဲ့ အသက် ၂၆ နှစ်အရွယ် ဦးသန်းထွေးအောင်ဟာ မူးယစ်ဆေးသယ်ဆောင်လို့ ပစ်ခတ်တာ မဟုတ်ဘဲ မှားယွင်းပစ်ခတ်ခံရတာဖြစ်ကြောင်း မိသားစုဝင်က ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၉ ရက် မနက် ၁ နာရီဝန်းကျင်မှာ KTV ကနေ ကားမောင်းလာတဲ့ ဦးသန်းထွေးအောင်ကို နမ့်ဖတ်ကာ ပြည်သူ့စစ်က သေနတ်နဲ့ချိန်ပြီး စစ်ဆေးဖို့တားတာကို ဓားပြတိုက်သူလို့ထင်ပြီး ကားကို ဆက်မောင်းခဲ့တာလို့ ဆိုပါတယ်။
“သူတို့ ကားကို တားတဲ့အချိန်မှာ ကားကို သူရပ်ပေးလိုက်တယ်။ မှန်ချဆိုတော့ သူ မှန်လဲချပေးတယ်။ သူတို့က ယူနီဖောင်း အမဲရောင် ဝတ်ထားတာဆိုတော့ ပြီးရင် သူ့ကိုလည်း သေနတ်နဲ့ ကျဉ်ထိုးပြီး ထောက်တယ်။ ဓားပြတိုက်တယ်ထင်လို့ သူလဲ မောင်းပြေးဖို့ လုပ်တဲ့အချိန်မှာ သူတို့ နောက်ကနေ ပစ်တာပေါ့။ ကားထဲမှာလည်း ဘာပစ္စည်းမှ မပါဘူး။ သူ့ဖုန်းဆိုင်က မန်နေဂျာဖြစ်တဲ့အတွက် သေနတ်တွေလဲ မရှိဘူး။ မူးယစ်ဆေးဝါး ပစ္စည်းတွေလည်း ကားပေါ်မှာ သယ်ဆောင်ထားတာ မရှိပါဘူး။ အပြန်အလှန် ပစ်ခတ်တယ်ဆိုတာလည်း မရှိပါဘူး” လို့ ၎င်းရဲ့ မိသားစုဝင်တစ်ဦးက ပြောပါတယ်။
မိသားစုဝင်အနေနဲ့ သေဆုံးသွားတဲ့သူကို နာမည်ဆိုးနဲ့ မကျန်စေချင်တာကြောင့် အမှန်တရား လိုလားကြောင်း ရွှေဖီမြေကို ပြောပါတယ်။
မူဆယ်မြို့ခံ အမျိုးသားတစ်ဦးကတော့ “အခုဆို မူဆယ်က ပြည်သူ့စစ်တွေ အမှောင်ထဲမှာဘဲ နေတယ်။ ပုန်းနေတဲ့ ပုံစံနဲ့ပေါ့။ ပြီးရင် သူတို့က ရုတ်တရက် တားလိုက်ရင် သတိမထားမိဘူးလေ။ တခါတလေကျရင် တားချင်မှ တားတာ။ ကျော်သွားရင်လဲ သူတို့က သေနတ်တွေ ချိန်ပြီး ပစ်တယ်။ သေသွားရင်တော့ တချို့ဆို မူးယစ်ဆေးဝါးတွေပါလို့ ပစ်တယ်ပေါ့” လို့ ပြောပါတယ်။
ပစ်ခတ်မှု ဖြစ်ပွားတဲ့နေရာဟာ မကြာခဏဆိုသလို ဓားပြတိုက်မှု ဖြစ်ပွားလေ့ရှိတဲ့နေရာ ဖြစ်နေတယ်လို့ ဒေသခံတွေရဲ့ ပြောပြချက်အရ သိရပါတယ်။
စစ်တပ် အာဏာသိမ်းပြီးနောက်ပိုင်း မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်း ပိုများလာပြီး ခိုးမှု၊ လုယက်မှုနဲ့ ဓားပြတိုက်မှုလည်း မကြာခဏ ဖြစ်ပွားနေပါတယ်။
