မိုင်းရူပ၊ ဖေဖော်ဝါရီ ၁၂ ရက်၊ ဗန်းမော်
ကချင်တပ်မတော်- KIA နဲ့ ပူးပေါင်းတပ်တွေ ထိုးစစ်ဆင် တိုက်ခိုက်နေတဲ့ ကချင်ပြည်နယ် ဗန်းမော် မြို့သိမ်းတိုက်ပွဲ ဆက်လက် ပြင်းထန်နေပြီး စစ်ကောင်စီတပ်ဘက်က လေကြောင်းသုံးကာ အပြင်းအထန် ခုခံနေတယ်လို့ KIA ရဲ့ ပြောခွင့်ရသူ ဗိုလ်မှူးကြီး နော်ဘူက ရွှေဖီမြေကို ပြောပါတယ်။
ဗန်းမော်မြို့တွင်းမှာရှိတဲ့ စစ်ကောင်စီရဲ့ လက်အောက်ခံ ဝန်ထမ်းတွေဟာ စစ်ဆင်ရေး ကွပ်ကဲမှုစစ်ဌာနချုပ် (၂၁)မှာ သွားစုနေကြပြီး စကခ ၂၁ မှာလည်း တိုက်ပွဲ ပြင်းထန်နေတယ်လို့ ဆိုပါတယ်။
“သူတို့ (စစ်ကောင်စီ)လည်း ခံတပ်ပုံစံမျိုးနဲ့ အခိုင်အမာ ကတုတ်ကျင်းတွေ တူး။ အထက်မြင့် တိုက်တွေမှာ နေပြီးတော့ ကျနော်တို့ KIA တပ်ဖွဲ့တွေကို ပစ်တာမျိုး ရှိတယ်။ ကျနော်တို့လည်း လက်နက်ကြီးနဲ့ ပစ်တာရှိတယ်။ မနေ့ညနေပိုင်းကလည်း သူတို့လေကြောင်းနဲ့ တော်တော်များများ ခုခံတာ ရှိတယ်” လို့ KIA ရဲ့ ပြောခွင့်ရသူ ဗိုလ်မှူးကြီး နော်ဘူက ရွှေဖီမြေကို ပြောပါတယ်။
တိုက်ပွဲအတွင်း နှစ်ဖက် အထိအခိုက် အကျအဆုံး များနိုင်ပြီး အရေအတွက် အတိအကျတော့ မသိရသေးဘူးလို့ ဗိုလ်မှူးကြီး နော်ဘူက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ၈ ရက်မှာ ဗန်းမော်အခြေစိုက် စစ်ကောင်စီရဲ့ တင့်ကားတပ်ရင်း (၅၀၁၄)ကို KIA က တိုက်ခိုက်သိမ်းပိုက်နိုင်ခဲ့တယ်လို့ သတင်း ထွက်ပေါ်နေပြီး ဗိုလ်မှူးကြီး နော်ဘူကတော့ ဒီသတင်းနဲ့ ပတ်သက်လို့ အတည်ပြုချက် မပေးပါဘူး။
ဗန်းမော်မြို့ရှိ စစ်ကောင်စီရဲ့ တပ်စခန်းတွေကို KIA နဲ့ ပူးပေါင်းတပ်က ပြီးခဲ့တဲ့ ၂၀၂၄ ဒီဇင်ဘာလထဲ စတင်ထိုးစစ်ဆင် တိုက်ခိုက်ခဲ့ရာ တိုက်ပွဲ ပြင်းထန်တာ ၂ လကျော်ကြာ ရှိနေပြီ ဖြစ်ပါတယ်။
စစ်တပ်ဘက်ကတော့ ဗန်းမော်တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးဘဲ စစ်ကောင်စီကို ထောက်ခံတဲ့ တယ်လီဂရမ်ချနခနယ်တွေမှာတော့ ဗန်းမော်တိုက်ပွဲမှာ စစ်ကောင်စီတပ်ဘက်က အကျအဆုံး များကြောင်း ရေးသားဖော်ပြနေကြပါတယ်။
KIA ဟာ ကချင်ပြည်နယ်အတွင်းရှိ အထူးဒေသ (၁)အပါအဝင် မြို့ ၁ဝ မြို့ကို တိုက်ခိုက်သိမ်းပိုက်နိုင်ခဲ့ပြီ ဖြစ်ပါတယ်။
