မိုင်းရူပ၊ ဖေဖော်ဝါရီ ၁၁ ရက်၊ ပြင်ဦးလွင်
စစ်ကောင်စီရဲ့ စစ်တက္ကသိုလ် တည်ရှိရာ မန္တလေးတိုင်း ပြင်ဦးလွင်မြို့မှာ သစ်တောနယ်မြေနဲ့ မလွတ်လို့ဆိုပြီး နေအိမ်တွေကို စစ်ကောင်စီတပ်က ဘူဒိုဇာနဲ့ လိုက်လံဖျက်ဆီးနေတယ်လို့ ပြင်ဦးလွင်မြို့ခံဆီက သိရပါတယ်။
ပြီးခဲ့တဲ့ ဖေဖော်ဝါရီ ပထမအပတ်ကစပြီး ပြင်ဦးလွင်မြို့ ရပ်ကွက်(၁)နဲ့ တောင်ပြိုရွာရှိ နေအိမ်အပြင် ပြင်ဦးလွင်မြို့အနီးရှိ နေအိမ်တွေကိုလည်း စစ်တပ်နဲ့ အုပ်ချုပ်ရေးအဖွဲ့က လိုက်လံဖျက်ဆီးနေတာပဲ ဖြစ်ပါတယ်။
“တစ်နေရာတည်း ဖျက်ခံရတာ မဟုတ်ဘူး။ ပြင်ဦးလွင် ပတ်ချာလည် အကုန်ပတ်ဖျက်တာ။ အများကြီးပဲ။ သစ်တောနယ်မြေနဲ့ မလွတ်ဘူးဆိုပြီး လိုက်ဖျက်တာ” လို့ ပြင်ဦးလွင်မြို့ခံတစ်ဦးက ရွှေဖီမြေကို ပြောပါတယ်။
ဘူဒိုဇာနဲ့ ဖျက်ဆီးခံခဲ့ရတဲ့ နေအိမ်တွေထဲ တိုက်အမြင့်တွေလည်း ပါဝင်တယ်လို့ သူက ဆက်ပြောပါတယ်။
လိုက်လံ ဖျက်ဆီးနေတဲ့ နေအိမ်အရေအတွက်ကိုတော့ မသိရသေးဘဲ စစ်ကောင်စီတပ်ဖွဲ့ဝင်ကို ကြောက်နေရတာကြောင့် နေအိမ် ဖျက်ဆီးခံရတဲ့ ဒေသခံတွေက ဘာမှ ပြန်မပြောရဲကြဘူးလို့ နောက်ထပ်ဒေသခံတစ်ဦးက ပြောဆိုပါတယ်။
ပြီးခဲ့တဲ့ ၂၀၂၃ ခုနှစ်ထဲမှာလည်း ပြင်ဦးလွင်မြို့ ရပ်ကွက်ကြီး(၇)က တောင်ရတနာရပ်ကွက်ကို ကျူးကျော်နေရာဆိုပြီး စစ်ကောင်စီ လက်အောက်ခံ မီးရထားဌာနက အိမ်ခြေ ၃၄၅ အိမ်ကို အတင်းအဓမ္မ ပြောင်းရွှေ့ခိုင်းတဲ့ဖြစ်စဥ် ဖြစ်ပွားခဲ့ဖူးပါတယ်။
