မိုင်းရူပ၊ ဖေဖော်ဝါရီ ၁၁ ရက်
စစ်ကောင်စီတပ်ရဲ့ အတင်းအဓမ္မ တပ်သားသစ်အဖြစ် စုဆောင်းခံရတဲ့ လူငယ်တွေအနေနဲ့ အနီးစပ်ဆုံး တော်လှန်ရေး အင်အားစုတွေထံ ဘက်ပြောင်းခိုလှုံဖို့ အမျိုးသား ညီညွတ်ရေးအစိုးရ- NUG က ဒီနေ့ ဖေဖော်ဝါရီ ၁၁ ရက်မှာ ကြေညာချက် ထုတ်ပြန်ပြီး တိုက်တွန်းလိုက်ပါတယ်။
စစ်တပ်ရဲ့ အတင်းအဓမ္မ တပ်သားသစ် စုဆောင်းခံရတဲ့ လူငယ်တွေအနေနဲ့ သင်တန်း တက်နေတဲ့ကာလဖြစ်စေ၊ သင်တန်းပြီးတဲ့ကာလဖြစ်စေ၊ ပြည်သူ့ရင်ခွင်သို့ ဆက်သွယ်တာ၊ နွေဦးတော်လှန်ရေးအင်အားစုနဲ့ တိုင်းရင်းသားလက်နက်ကိုင် အဖွဲ့အစည်းတွေထံ ဆက်သွယ်ပြီး အလင်းဝင်ကြဖို့ NUG က တိုက်တွန်းထားတာ ဖြစ်ပါတယ်။
အလင်းဝင်လာတဲ့ လူငယ်တွေရဲ့ ဘေးကင်းလုံခြုံရေးကို တာဝန်ယူသွားမှာဖြစ်ပြီး လက်နက်ခဲယမ်းတွေ ပါလာတဲ့သူတွေကို ဆုငွေ ချီးမြှင့်သွားမယ်လို့ ဆိုပါတယ်။
နိုင်ငံတဝန်းရှိ စစ်ပွဲတွေမှာ အကျအဆုံး များစွာနဲ့ ဆက်တိုက် ကြုံနေရတဲ့ စစ်တပ်ဟာ ၎င်းတို့ရဲ့ လူအင်အား လိုအပ်ချက်ကို ဖြည့်ဆည်းဖို့ အဓမ္မ တပ်သားသစ် စုဆောင်းတဲ့ နည်းကို မိုက်မဲစွာ ကျင့်သုံးနေတယ်လို့ NUG က ဆိုပါတယ်။
စစ်တပ်ဟာ စစ်မှုထမ်းဥပဒေ ပြဌာန်းပြီးနောက်ပိုင်း ၎င်းတို့ အုပ်ချုပ်နိုင်တဲ့ ဒေသတွေမှာရှိတဲ့ လူငယ်တွေကို အတင်းအဓမ္မ တပ်သားသစ် စုဆောင်းတာ၊ ပေါ်တာ ဆွဲတာတွေ ပြုလုပ်နေပါတယ်။
“တပ်သားသစ်တော့ ဆက်တိုက် ကောက်နေတာ။ မသွားနိုင်ရင် သွားတဲ့သူတွေအစား ငွေပေးရတယ်” လို့ ပြင်ဦးလွင်ဒေသခံတစ်ဦးက ရွှေဖီမြေကို ပြောပါတယ်။
လက်ရှိမှာ စစ်တပ်ဟာ စစ်မှုထမ်းသင်တန်း အပတ်စဥ် (၉)အထိ ဖွင့်လှစ်ထားပြီး အပတ်စဥ် (၇)အထိတော့ သင်တန်း ဆင်းထားပြီးဖြစ်ကာ အပတ်စဉ်တစ်ခုကို သင်တန်းသား ဦးရေ ၅ ထောင်အထိ သတ်မှတ်ထားပါတယ်။
ပြီးခဲ့တဲ့ ဇန်နဝါရီလအတွင်း စစ်တပ်ရဲ့ အတင်းအဓမ္မ တပ်သားသစ် စုဆောင်းခံရတဲ့ လူငယ် ၃၁ ဦးကို စစ်ကောင်စီတပ်ရဲ့ လက်ထဲကနေ ခေါ်ထုတ်နိုင်ခဲ့တယ်လို့ ပြည်သူ့ရင်ခွင်က ဖေဖော်ဝါရီ ၉ ရက်မှာ ထုတ်ပြန်ထားပါတယ်။
