ယာရူစိင်၊ ဖေဖော်ဝါရီ ၁၁ ရက်၊ မူဆယ်
စစ်တပ် ထိန်းချုပ်ထားတဲ့ မူဆယ်မြို့မှာ မူးယစ်ဆေး သယ်ဆောင်လာတဲ့ အမျိုးသားတစ်ဦးကို စစ်ကောင်စီ လက်အောက်ခံ နမ့်ဖတ်ကာ ပြည်သူ့စစ်က ပစ်ခတ်လို့ သေဆုံးသွားခဲ့ကြောင်း ရွှေဖီမြေက စုံစမ်းသိရှိရပါတယ်။
ဖြစ်စဉ်ဟာ ဖေဖော်ဝါရီ ၉ ရက် မနက်အစောပိုင်းက ကားမောင်းလာတဲ့ အမျိုးသားတစ်ဦးဟာ လမ်းမှာ စောင့်ဆိုင်းစစ်ဆေးနေတဲ့ ပြည်သူ့စစ်နဲ့ ထိပ်တိုက်တွေ့ပြီး အချင်းချင်း ပစ်ခတ်မှု ဖြစ်ပွားရာ မူးယစ်ဆေး သယ်ဆောင်တဲ့ အမျိုးသား သေဆုံးသွားခဲ့တာလို့ မြေပြင်အခြေအနေ သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“အဲဒီသေသွားတဲ့ အမျိုးသားလဲ သေနတ် ပါတယ်။ သူ့ကို ရပ်ဖို့ တားတော့ သူမရပ်ပေးဘူး။ အဲဒါကြောင့် အပြန်အလှန် ပစ်ခတ်မှုဖြစ်ပွားသွားတယ်။ သူကတော့ ပွဲချင်းပြီး သေသွားတယ်”
ပစ်ခတ်မှုကြောင့် သေဆုံးသွားတဲ့ အမျိုးသားဟာ အသက် ၂၆ နှစ်အရွယ်ရှိတဲ့ ဦးသန်းထွေးအောင်ခေါ် ရှောင်ဖောင်းဆိုသူ ဖြစ်တယ်လို့လည်း ဆက်ပြောပါတယ်။
နောက်ထပ် သတင်းအရင်းအမြစ် အမျိုးသားတစ်ဦးက “သေဆုံးသွားတဲ့ အဲဒီအမျိုးသားက ဖုန်းဆိုင်တစ်ဆိုင်မှာ မန်နေဂျာ ရာထူးနေရာမှာ အလုပ် လုပ်တဲ့သူတစ်ယောက်လို့တော့ ကြားမိတယ်။ သူ့ကားပေါ်မှာ ပြည်သူ့စစ်က ပြန်စစ်ဆေးတဲ့အချိန်မှာ မူးယစ်ဆေးဝါးနဲ့ သေနတ်တွေ တွေ့တယ်” လို့ ပြောပါတယ်။
ပြီးခဲ့တဲ့ ဖေဖော်ဝါရီ ၂ ရက် နေ့လယ် ၃ နာရီမှာ မူဆယ်မြို့ စွမ်စော်ရပ်ကွက်အတွင်း ကင်းလှည့်နေတဲ့ စစ်တပ် လက်အောက်ခံ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဝင်တစ်ဦးကို အမည်မသိ လက်နက်ကိုင်က သေနတ်နဲ့ ပစ်ခတ်တာကြောင့် ပွဲချင်းပြီး သေဆုံးသွားခဲ့တဲ့ဖြစ်စဉ်လည်း ဖြစ်ပွားခဲ့ဖူးပါတယ်။
စစ်တပ်က အာဏာသိမ်းပြီးနောက်ပိုင်း မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်း ပိုများလာပြီး ခိုးမှု၊ လုယက်မှုနဲ့ ဓားပြတိုက်မှုတွေလည်း မကြာခဏ ဖြစ်ပွားနေပါတယ်။
