မိုင်းရူပ၊ ဖေဖော်ဝါရီ ၄ ရက်
မြောက်ပိုင်းမဟာမိတ်ဖြစ်တဲ့ ကချင်တပ်မတော်- KIA နဲ့ တအာင်းတပ်မတော်- TNLA တို့အကြား ဖြစ်ပွားနေတဲ့ နယ်မြေအငြင်းပွားမှုကို နှစ်ဖက်တာဝန်ရှိသူတွေက ဖြေရှင်းပြီးပြီလို့ KIA ရဲ့ ပြောခွင့်ရသူ ဗိုလ်မှူးကြီး နော်ဘူက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီလ နောက်ဆုံးအပတ်မှာ TNLA နဲ့ KIA အကြား အငြင်းပွားမှု ဖြစ်ပြီးနောက်ပိုင်း နှစ်ဖက်တပ်ဘက်က တပ်ရင်းတာဝန်ရှိသူနဲ့ အုပ်ချုပ်ရေးပိုင်း တာဝန်ရှိသူတွေ တွေ့ဆုံပြီး နှစ်ဖက်တပ်အကြား ပြဿနာကို ဖြေရှင်းခဲ့တာလို့ ဆိုပါတယ်။
“အချင်းချင်း လိုအပ်တဲ့ဟာတွေ ပံ့ပိုးကူညီကြဖို့ သွားလာခွင့်ပြုဖို့။ အချင်းချင်းကြား အသိအမှတ်ပြု လေးစားဖို့ ပြောတယ်လို့ သိရပါတယ်။ အဲနောက်ပိုင်းမှာ ပွတ်တိုက်မှုတွေ မရှိတော့ဘူး” လို့ KIA ရဲ့ ပြောခွင့်ရသူ ဗိုလ်မှူးကြီး နော်ဘူက ရွှေဖီမြေကို ပြောပါတယ်။
ပြီးခဲ့တဲ့နှစ် ဇွန်လ နောက်ဆုံးအပတ်မှာလည်း ရှမ်းမြောက် မန်တုံ၊ မိုးမိတ်နဲ့ ကွတ်ခိုင်မြို့မှာ KIA နဲ့ TNLA ရဲ့ အောက်ခြေတပ်ဖွဲ့ဝင်အကြား နယ်မြေအငြင်းပွားမှု ဖြစ်ခဲ့ကြပြီး ထိုးကြိတ်တဲ့အဆင့်ထိ ဖြစ်ခဲ့ပေမဲ့ သေနတ် ဖောက်တာမျိုးတော့ မရှိခဲ့ပါဘူး။
TNLA နဲ့ KIA အကြား အငြင်းပွားမှုနဲ့ ပတ်သက်လို့ နှစ်ဖက်တပ်အကြား ဆွေးနွေးမှု သဘောတူညီချက် အသေးစိတ်သိရဖို့ TNLA ရဲ့ ပြောရေးဆိုခွင့်ရှိသူ လွေးယေဦးကို ဆက်သွယ်မေးမြန်းထားဆဲ ဖြစ်ပါတယ်။
TNLA နဲ့ KIA ဟာ မြောက်ပိုင်းမဟာမိတ်ဖြစ်တဲ့အပြင် “ဝ”တပ်- UWSA ဦးဆောင်တဲ့ ပြည်ထောင်စု နိုင်ငံရေး ဆွေးနွေးညှိနှိုင်ရေးကော်မတီ- FPNCC ရဲ့ အဖွဲ့ဝင်လည်း ဖြစ်ပါတယ်။
