ရွှေဖီမြေ၊ ဇူလိုင် ၂၃ ရက်၊ သီပေါ
သီပေါတံတား ပိတ်ထားတာကြောင့် ရှမ်းမြောက် သီပေါမြို့နယ် တာလုံရွာအနီးရှိ တာလုံချောင်းမှာ လှေနဲ့ ဇက်ကူးပြီး ချောင်းထဲ မျှောပါပျောက်ဆုံးနေသူ ၅ ဦးထဲက အမျိုးသားတစ်ဦးရဲ့ အလောင်းကို ဒီနေ့ ဇူလိုင် ၂၃ ရက်မှာ ပြန်ရှာတွေ့ပြီလို့ သိရပါတယ်။
ပြီးခဲ့တဲ့ ဇူလိုင် ၁၉ ရက် မနက်အစောပိုင်းမှာ လှေလှော်တဲ့ အမျိုးသား ၂ ဦးနဲ့ ကားတစ်စီးပေါ်က လူ ၅ ဦး ရေထဲမျှောပါပြီး နှစ်ဦးက အသက်ရှင်ခဲ့ပေမယ့် ကျန် ၅ ဦးက ရေထဲမျှောပါ ပျောက်ဆုံးနေတာ ဖြစ်ပါတယ်။
“ကားလည်း ပြန်တွေ့ပြီ။ ပြီးတော့ နောင်ပိန်က ဗလီဆရာတစ်ယောက်ရဲ့ အလောင်းလည်း တွေ့ထားပြီ။ ကျန်တဲ့သူတွေ မတွေ့သေးဘူး” လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
ရေထဲမျှောပါ ပျောက်ဆုံးသူတွေထဲက ၃ ဦးဟာ ရှမ်းမြောက် ကျောက်မဲမြို့နယ် နောင်ပိန်ကျေးရွာခံတွေ ဖြစ်ပြီး ကျန် ၂ ဦးရဲ့ နေရပ်ကိုတော့ မသိရသေးပါဘူး။
ပြီးခဲ့တဲ့ ၂၀၂၅ ခုနှစ် နိုဝင်ဘာလကစပြီး စစ်ကောင်စီတပ်က လားရှိုး-သီပေါကို ဆက်သွယ်ထားတဲ့ သီပေါတံတားကို ပိတ်ထားတာကြောင့် ခရီးသွားတွေက ချောင်းကနေ ဇက်ကူးပြီး ဖြတ်သန်းသွားလာနေရပါတယ်။
လူထုတွေကတော့ သီပေါတံတားကို ပြန်ဖွင့်ပေးဖို့ တောင်းဆိုနေကြပြီး စစ်ကောင်စီတပ်ဘက်ကတော့ ၁ နှစ်နီးပါးကြာတဲ့အထိ သီပေါတံတားပေါ်ကို ဖြတ်သန်းသွားလာခွင့် ပိတ်ထားဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
