မိုင်းရူပ၊ ဖေဖော်ဝါရီ ၄ ရက်၊ နောင်ချို
ရှမ်းမြောက် နောင်ချိုမြို့နယ် တောင်းခမ်းရွာအပြင် နောင်ချိုနဲ့ မန္တလေးတိုင်း ပြင်ဦးလွင်ကြားရှိ ဂန့်ကော်ရွာအနီးတစ်ဝိုက်မှာ စစ်ကောင်စီတပ်နဲ့ တအာင်းတပ်မတော်- TNLA တို့ နေ့စဥ်လိုလို တိုက်ပွဲ ဆက်လက် ပြင်းထန်နေတယ်လို့ ရွှေဖီမြေက စုံစမ်းသိရှိရပါတယ်။
တောင်းခမ်းရှိ စစ်တပ်စခန်းကနေ TNLA ထိန်းချုပ်ထားတဲ့ နေရာတွေကို စစ်ကောင်စီတပ်က ထိုးစစ်ဆင် တိုက်ခိုက်နေပြီး လက်နက်ကြီးနဲ့ ဒရုန်းသုံး တိုက်ခိုက်တာတွေကို စစ်တပ်က ပိုသုံးလာတယ်လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“စစ်ကောင်စီက ဆက်တိုက် ထိုးနေတာ။ TNLA က ထိန်းချုပ်ထားတဲ့နေရာတွေ ပြန်ဆုတ်ပေးရတာ ရှိတယ်။ တိုက်ပွဲကတော့ နေ့တိုင်း ပြင်းထန်တယ်။ စစ်ကောင်စီက လက်နက်ကြီးနဲ့ ဒရုန်းကို ဦးစားပေး သုံးလာတာ တွေ့ရတယ်”
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ အပါအဝင် အမြှောက်တပ်တပ်စခန်းတွေ ဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားပြီး တောင်းခမ်းမှာ စစ်တပ်နဲ့ TNLA တို့ တိုက်ပွဲ ပြင်းထန်နေတာ ၅ လနီးပါးကြာ ရှိနေပြီ ဖြစ်ပါတယ်။
တောင်းခမ်းတိုက်ပွဲ စတင်ဖြစ်ပွားချိန် စစ်ကောင်စီရဲ့ အမြှောက်တပ် ၂၀၆ ကို TNLA က တိုက်ခိုက်သိမ်းပိုက်နိုင်ခဲ့ပေမဲ့ လက်ရှိမှာတော့ တောင်းခမ်းရွာရှိ အမြှောက်တပ်စခန်းအားလုံးကို စစ်တပ်က ပြန်လည်ထိန်းချုပ်ထားပါတယ်။
တောင်းခမ်းနဲ့ မိုင် ၂၀ ခန့် ကွာဝေးတဲ့ နောင်ချိုမြို့ကိုတော့ ပြီးခဲ့တဲ့ ဇူလိုင် ၁၀ ရက်ကတည်းက TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်ပြီး အုပ်ချုပ်နေတာ ဖြစ်ပါတယ်။
စစ်တပ်ဘက်ကတော့ တောင်းခမ်းတိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
