မိုင်းရူပ၊ ဖေဖော်ဝါရီ ၃ ရက်၊ မန္တလေး
မန္တလေးတိုင်းအတွင်းရှိ မြို့နယ် ၇ ခုမှာ ၁ လအတွင်းမှာတင် လူငယ် ၂၃၇ ဦး အတင်းအဓမ္မ တပ်သားသစ်အဖြစ် စုဆောင်းခံရပြီး စစ်ကောင်စီတပ်က အမျိုးသမီးတွေကိုပါ ပေါ်တာဆွဲနေတယ်လို့ မန္တလေး သပိတ်အင်အားစုက ပြောပါတယ်။
ပြီးခဲ့တဲ့ ဇန်နဝါရီ ၁ ရက်ကနေ ၃၁ ရက်အထိ အောင်မြေသာစံ၊ ချမ်းအေးသာစံ၊ မဟာအောင်မြေ၊ ချမ်းမြသာစည်၊ ပြည်ကြီးတံခွန်၊ အမရပူရနဲ့ ပုသိမ်ကြီးမြို့နယ်က အတင်းအဓမ္မ တပ်သားသစ်အဖြစ် စုဆောင်းခံရတဲ့ လူငယ်တွေရဲ့ စာရင်းကို ပြုစုထားတာလို့ ဆိုပါတယ်။
စစ်တပ်ဟာ စစ်မှုထမ်းဖို့အတွက် အမျိုးသားအပြင် အမျိုးသမီးတွေကိုပါ ဖမ်းဆီးနေတယ်လို့ မန္တလေး သပိတ်အင်အားစုရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
“စစ်ကောင်စီတပ်ဟာ ဆက်တိုက်ဆိုသလို ပေါ်တာဆွဲတာတွေ ပြုလုပ်နေပါတယ်။ အခုအခြေအနေက ပိုဆိုးလာတယ်။ အမျိုးသမီးတွေကို ဖမ်းလာတယ်”
စစ်မှုထမ်းရမယ့် အမျိုးသမီးရဲ့ အသက်ကိုတော့ စစ်တပ်က ၁၈ နှစ်ကနေ ၂၇ နှစ်အတွင်း သတ်မှတ်ထားပါတယ်။
ဒါပေမဲ့ စစ်ကောင်စီတပ်ဘက်ကတော့ အမျိုးသမီးတွေကို စစ်မှုထမ်းဖို့ ခေါ်ဆောင်တာ မရှိသေးကြောင်း ၎င်းတို့ ထိန်းချုပ်ထာတဲ့ မီဒီယာတွေမှာ ငြင်းဆိုထားပါတယ်။
နိုင်ငံတဝန်းမှာ စစ်ရှုံးနေတဲ့ စစ်ကောင်စီတပ်ဟာ တပ်သားသစ် လိုအပ်ချက်ကြောင့် ၂၀၂၄ ခုနှစ် ဖေဖော်ဝါရီ ၁၀ ရက်မှာ စစ်မှုမထမ်းမနေရဥပဒေ ထုတ်ပြန်ပြီး ၎င်းတို့ထိန်းချုပ်ထားတဲ့ နေရာတွေမှာ တပ်သားသစ် အတင်းအဓမ္မ စုဆောင်းတာနဲ့ ပေါ်တာ ဆွဲတာတွေ ပြုလုပ်လာတာ ဖြစ်ပါတယ်။
လက်ရှိမှာ စစ်တပ်က စစ်မှုထမ်းသင်တန်း အပတ်စဥ် ၉ အထိ ဖွင့်လှစ်ထားပြီး အပတ်စဥ် ၇ အထိတော့ သင်တန်း ဆင်းထားပြီ ဖြစ်ပါတယ်။
အပတ်စဉ်တစ်ခုမှာ သင်တန်းသားဦးရေ ၅ ထောင်အထိ သတ်မှတ်ကာ စစ်သင်တန်းတွေ ပေးနေတာလည်း ဖြစ်ပါတယ်။
