မိရိုး၊ ဩဂုတ် ၁၈၊ ရွာငံ
ရှမ်းပြည်နယ်တောင်ပိုင်း၊ ရွာငံမြို့နယ်မှာ စစ်ကောင်စီတပ်က ဒေသခံတွေကို သေနတ်နဲ့ ပစ်ခတ်ဖမ်းဆီးတာတွေ ပြုလုပ်နေသလို ကျေးရွာအများစုကိုလည်း ရွာလုံးကျွတ် ထွက်ခွာခိုင်းနေတာကြောင့် ဒေသခံ ပြည်သူတွေ ဘေးလွတ်ရာကို ထပ်မံထွက်ပြေး တိမ်းရှောင်နေကြရပါတယ်။
ပြီးခဲ့တဲ့ ဩဂုတ် ၁၆ ရက်ကစပြီး ရွာငံမြို့နယ်ထဲက မြိုင်၊ အလယ်ချောင်းနဲ့ ဆင်ခေါင်းကျေးရွာအုပ်စု အပါအဝင် ကျေးရွာအများစုကို စစ်ကောင်စီတပ်က အကြောင်းပြချက် အမျိုးမျိုးပြပြီး ၃ ရက်အတွင်း ပြောင်းရွှေ့ပေးဖို့ အမိန့်ပေးခဲ့တာ ဖြစ်ပါတယ်။
ဒါ့အပြင် မျှားကလေးရွာဖက်မှာ လမ်းစပိတ်ထားပြီး သိမ်ကုန်းကျေးရွာအုပ်စုနဲ့ ရေဦးကျေးရွာအုပ်စုမှာ အင်အားအလုံးအရင်းနဲ့ တပ်စွဲကာ ညဘက်တွေမှာ ဒရုန်းနဲ့ ကင်းလှည့်တာ၊ စစ်ကြောင်းထိုး စစ်ဆေးဖမ်းဆီးတာတွေ လုပ်ဆောင်နေတယ်လို့ ဒေသခံတွေက ပြောပါတယ်။
ရေဦးကျေးရွာအုပ်စုဘက်မှာ တပ်စွဲထားတဲ့ စစ်ကောင်စီတပ်ဟာ ထွက်ပြေးဖို့ ပြင်ဆင်နေတဲ့ လူငယ် ၅ ဦးကို သေနတ်နဲ့ ပစ်ခတ်ခဲ့တာကြောင့် လူငယ်တစ်ဦး ကျည်ထိမှန် ဒဏ်ရာရရှိခဲ့ပြီး မြိုင်ဆေးရုံကို ပို့ဆောင်ထားရသလို ကျန်တဲ့ လူငယ် ၄ ဦးကိုလည်း ဖမ်းဆီးရိုက်နှက်ခဲ့တယ်လို့ သိရပါတယ်။
စစ်ကောင်စီရဲ့ ခြိမ်းခြောက်မှုနဲ့ ဓနုဒေသအခြေစိုက် ပြည်သူ့ကာကွယ်ရေးတပ်မတော် (PDF) ၁၀၀၃ တပ်ရင်းရဲ့ ထုတ်ပြန်ချက်တွေကြောင့် ဒေသခံတွေဟာ နီးစပ်ရာ မြို့နယ်တွေနဲ့ ဘေးလွတ်ရာ ကျေးရွာတွေကို တိမ်းရှောင်နေကြရပါတယ်။
ရွာငံဒေသခံ အမျိုးသားတစ်ဦးက “ရွာမှာ တချို့တွေက ရှောင်ကုန်ကြပြီ။ အစက နေဦးမလို့ပဲ၊ ညဆို ဒရုန်းတွေ ဝဲနေတာနဲ့ မနေရဲတော့ဘူး။ ပစ္စည်းသင်္ခါရပဲဆိုပြီး အိမ်ကို စိတ်ချချထားခဲ့လိုက်တယ်။ စစ်သားတွေ ရွာထဲ ညတိုင်း ကင်းလှည့်နေတယ်” လို့ ပြောပါတယ်။
ရွာငံမြို့နယ်မှာ ပြီးခဲ့တဲ့ ဇူလိုင်လ နောက်ဆုံးပတ်ကစပြီး စစ်ကောင်စီတပ်က အင်အားအလုံးအရင်းနဲ့ စစ်ကြောင်းထိုးလာတာကြောင့် ဓနုပြည်သူ့လွတ်မြောက်ရေးတပ်တော် (DPLA) နဲ့ တိုက်ပွဲတွေ စတင်ဖြစ်ပွားခဲ့တာပါ။
အဲဒီနောက်ပိုင်း နှစ်လနီးပါးကာလအတွင်း PDF နဲ့ ဆက်စပ်တယ်ဆိုတဲ့ အကြောင်းပြချက် အပါအဝင် အကြောင်းပြချက် အမျိုးမျိုးနဲ့ ဒေသခံ ၄၂ ဦးထက်မနည်းကို စစ်ကောင်စီတပ်က ဖမ်းဆီးထားပါတယ်။
ရွာငံမြို့နယ်ဟာ စစ်ကောင်စီတပ်အပြင် ဓနုပြည်သူ့လွတ်မြောက်ရေးတပ်တော် (DPLA)၊ ဓနုပြည်နယ် အမျိုးသားလွတ်မြောက်ရေးတပ်မတော် (DSNDA) နဲ့ NUG ရဲ့ ပြည်သူ့ကာကွယ်ရေးတပ်ဖွဲ့ (PDF) တပ်ရင်း ၁၀၀၃ စတဲ့ တော်လှန်ရေးတပ်ဖွဲ့တွေ အဓိက လှုပ်ရှားနေတဲ့ နယ်မြေတစ်ခု ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
