ပျားကြီး၊ ဇန်နဝါရီ ၃၁ ရက်၊ မန္တလေး
စစ်ကောင်စီဟာ မန္တလေးမြို့ပေါ်က ဘောလုံးကွင်းနဲ့ စာသင်ကျောင်း ပတ်လည်မှာ ရှိနေတဲ့ နေအိမ်ဆိုင်ခန်းပေါင်း ၅၀၀ နီးပါးကို တစ်ပတ်အတွင်း ဖယ်ရှားရှင်းလင်းပစ်ခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့ သီတင်းပတ်အစောပိုင်းက ချမ်းအေးသာဇံမြို့နယ်မှာရှိတဲ့ ဗထူးဘောလုံးအားကစာကွင်းက နေအိမ်ဆိုင်ခန်းအပါအဝင် ဘောလုံးကွင်းပတ်လည်က ဆိုင်ခန်းပေါင်း ၂၅၀ ကျော်ကို ဖယ်ရှားရှင်းလင်းခဲ့တာဖြစ်ပြီး ဒီနေ့မှာတော့ အောင်မြေသာစံမြို့နယ်မှာရှိတဲ့ စာသင်ကျောင်းက ဆိုင်ခန်းပေါင်း ၂၀၀ ကျော်ကို ထပ်မံ ဖယ်ရှားရှင်းလင်းပစ်ခဲ့တာ ဖြစ်ပါတယ်။
“ဒီလို အထွေထွေ ကြပ်တည်းနေတဲ့အချိန်မှာလူတွေကို အိုးမဲ့အိမ်မဲ့ဖြစ်အောင် လုပ်တာက မဖြစ်သင့်ဘူးပေါ့။ အဲ့ဒီနေရာတွေမှာ ကျောင်းနေအရွယ်ကလေးတွေ အများကြီးပါနေတယ်။ အခုကျ သူတို့အတွက် အများကြီး ခက်ခဲသွားပြီ” လို့ ဆိုင်ခန်း ဖယ်ရှားခံရသူ ဒေသခံတစ်ဦးက ပြောပါတယ်။
ဘောလုံးကွင်းနဲ့ စာသင်ကျောင်းက နေအိမ်ဆိုင်ခန်းတွေဟာ အရင်စစ်အာဏာရှင် သန်းရွှေလက်ထက်မှာ နှစ်ပေါင်း ၃၀ သက်တမ်းနဲ့ တရားဝင် ဆောက်လုပ်ရောင်းချပေးခဲ့တာဖြစ်ပေမဲ့ လက်ရှိ ဖယ်ရှားခံရချိန်မှာ နေထိုင်ခွင့်သက်တမ်း အနည်းဆုံး ၆ နှစ်ကနေ ၈ နှစ်အထိ ကျန်ရှိနေသေးတယ်လို့ ဖယ်ရှားခံရသူတွေက ပြောဆိုပါတယ်။
နေအိမ်ဆိုင်ခန်း ဖယ်ရှားရှင်းလင်းမှုကို ရာနဲ့ချီတဲ့ စစ်ကောင်စီ လက်အောက်ခံ ရဲ၊ စည်ပင်၊ မီးသတ်နဲ့ ထွေအုပ်ဝန်ထမ်းက လိုက်လံ လုပ်ဆောင်တာဖြစ်ပြီး အမိုးအကာအပါအဝင် အဆောက်အဦးရဲ့ ၆၀ ရာခိုင်နှုန်းလောက်ကို ဖြိုချဖျက်ဆီးခဲ့တာလို့ မျက်မြင်တွေ့သူတွေက ပြောပါတယ်။
ဒါ့အပြင် မန္တလေးမြို့အနီးဝန်းကျင်မှာစစ်ရိပ်စစ်ငွေ့ သမ်းလာတာနဲ့အမျှ စစ်ကောင်စီဟာ အလယ်ပိုင်းတိုင်းစစ်ဌာနချုပ်အပိုင်စီး တပ်စွဲထားတဲ့ နန်းတွင်းရဲ့ ၁ မိုင်ပတ်လည် အကွာအဝေးအတွင်း အထပ်မြင့်အဆောက်အဦး ဆောက်လုပ်ခွင့်ကို ဇန်နဝါရီလကစပြီး ပိတ်ပင်ခဲ့တာ တွေ့ရပါတယ်။
