ရွှေဖီမြေ၊ ဇူလိုင် ၂၃ ရက်၊ နမ့်ခမ်း
တအာင်းတပ်ထိန်းချုပ်ထားတဲ့ တရုတ်-မြန်မာနယ်စပ် နမ့်ခမ်းမြို့မှာ ရွှေလီမြစ် ရေကြီးမှုကြောင့် ဓာတ်ဆီတင်ယာဉ်တွေ ဝင်ရောက်မလာနိုင်တဲ့အတွက် ဓာတ်ဆီပြတ်လပ်လာပြီး ဆီဆိုင်တွေက ဓာတ်ဆီကို အကန့်အသတ်နဲ့သာ ရောင်းချနေတယ်လို့ နမ့်ခမ်းမှာ နေထိုင်သူ အမျိုးသမီးတစ်ဦးက ရွှေဖီမြေကို ပြောပါတယ်။
ဒီနေ့ ဇူလိုင် ၂၁ ရက်မှာ နမ့်ခမ်းမြို့ရှိ ပန့်ဆီဆိုင်တွေ ဖွင့်လှစ်ရောင်းချပေမယ့် ပန့်ဆိုင်တချို့က 92 နဲ့ 95 ဓာတ်ဆီတွေ ကုန်နေကြောင်း သိရပါတယ်။
နမ့်ခမ်းမှာ နေထိုင်သူ တစ်ဦးက “ဆိုင်တွေတော့ဖွင့်တယ်။ သွားမေးကြည့်တော့ မရှိတော့ဘူးတဲ့။ 92 နဲ့ 95 ဓာတ်ဆီတွေ မရှိတော့ဘူး။ မရှိတော့တာလား မရောင်းတာလားတော့ မသိဘူး” လို့ ပြောပါတယ်။
ပန့်ဆီဆိုင်အများစုမှာ ဓာတ်ဆီပြတ်လပ်လာတာကြောင့် ပါဆယ်နဲ့ ကားတွေကို ဓာတ်ဆီထည့်သွင်းရောင်းချခြင်း မပြုတော့ဘူးလို့ နောက်ထပ် ဒေသခံအမျိုးသမီးတစ်ဦးက ဆိုပါတယ်။
“ဆိုင်က မပိတ်ဘူး။ ဖွင့်တယ် ဒါပေမယ့် ဆီဆိုင်ရဲ့နံရံမှာ စာကပ်ထားတယ်။ ပန့်ဆိုင်တွေမှာ 95 ကုန်နေပါပြီဆိုပြီး ရေးထားတယ်။ ၄၊ ၅ ဆိုင်ရှိတယ်။ တချို့ဆိုင်က ပါဆယ်နဲ့ ကားတွေမထည့်ပေးတော့ဘူး” လို့ ပြောပါတယ်။
နမ့်ခမ်းမြို့မှာ အခုရက်ပိုင်းအတွင်း မိုးဆက်တိုက်ရွာသွန်းမှုနဲ့ ပြီးခဲ့တဲ့ ဇူလိုင် ၈ ရက်က တရုတ်နိုင်ငံဘက်ရှိ လောင်းကျန်းရေကာတာ ရေလွှတ်ချခဲ့တာကြောင့် ရွှေလီမြစ်ရေ တဖြည်းဖြည်း မြင့်တက်လာခဲ့ပြီး ဓာတ်ဆီတင်ယာဉ်တွေ ဖြတ်သန်းသွားလာလို့ မရတာကြောင့် ဓာတ်ဆီတွေ ပြတ်လပ်လုနီးပါး ဖြစ်လာတယ်လို့ နောက်ထပ်ဒေသခံအမျိုးသားတစ်ဦးက ပြောပါတယ်။
ရေကာတာဖွင့်ချခဲ့ချိန်ကစပြီး လက်ရှိအချိန်အထိ ရွှေလီမြစ်ကမ်းဘေးမှာရှိတဲ့ ဒေသခံတွေရဲ့ ကြံခင်း၊ ပြောင်းခင်း၊ စပါးခင်းနဲ့ အခြားစိုက်ပျိုးခင်းတွေ ရေလွှမ်းမိုးခြင်းဒဏ်ကို ခံစားကြရသလို သဲထုတ်လုပ်ငန်းတွေနဲ့ ကမ်းကူးလုပ်ငန်းတွေအကုန်လုံး ရပ်နားကြရတယ်လို့ တအာင်းသဘာဝပတ်ဝန်းကျင်စောင့်ကြည့်ရေးအဖွဲ့ – TEWG က ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
