မိုင်းရူပ၊ ဇူလိုင် ၂၀ ရက်၊ ဖားကန့်
ကချင်ပြည်နယ် ဖားကန့်မြို့မှာ ဥရုချောင်းရေကြီးမှုကြောင့် စံချိန်တင်ရေကြီးရေလျှံတာတွေ ဖြစ်ပွားနေပြီး နေအိမ်တချို့ ရေထဲနစ်မြုပ်ကာ အရေးပေါ်အကူအညီ လိုအပ်နေတယ်လို့ လူမှုကယ်ဆယ်ရေးအဖွဲ့တွေဆီက သိရပါတယ်။
မနေ့ ဇူလိုင် ၁၉ ရက်ကစလို့ ဖားကန့်မြို့မှာ မိုးအဆက်မပြတ် ရွာသွန်းမှုကြောင့် ဥရုချောင်းရေကြီးလာပြီး မြို့တွင်း မြေနိမ့်ရပ်ကွက်တွေမှာ နေအိမ်တွေ နစ်မြုပ်တာ၊ မြေပြိုတာတွေ ဖြစ်ပွားနေတယ်လို့ ဆိုပါတယ်။
“ရေကြီးတာက အခုထိ မကျသေးဘူး။ အခုကြီးတဲ့ရေက ဖားကန့်၊ လုံးခင်းမှာ စံချိန်တင်ကြီးတဲ့ရေပေါ့။ လူထုတွေအတွက် အရေးပေါ်အစားအသောက်တွေ လိုအပ်နေပါတယ်” လို့ ကူညီကယ်ဆယ်ရေးလုပ်နေသူ တစ်ဦးက ရွှေဖီမြေကို ပြောပါတယ်။
ရေကြီးရေလျှံတာတွေ ကြုံနေရတဲ့ ရပ်ကွက်တွေထဲမှာ ငှက်ပျောတော၊ အေးမြသာယာ၊ မှော်ဝမ်း၊ မရှီကထောင်၊ ဆန်းကြွယ် စတဲ့ ရပ်ကွက်တွေဖြစ်ပြီး ရေကြီးရေလျှံမှုကြောင့် ပျက်စီးမှုအသေးစိတ်ကိုတော့ ဆက်လက်စုံစမ်းနေဆဲ ဖြစ်ပါတယ်။
ကျောက်စိမ်းထွက်တဲ့ ဖားကန့်ဒေသမှာ ရေကြီးရေလျှံတာတွေ မကြာခဏဖြစ်ပွားနေပြီး ကျောက်လုပ်ကွက်တွေအတွင်း မြေပြိုတာတွေ မကြာခဏဖြစ်ပွားနေကာ သေဆုံးသူတွေလည်း အများအပြား ရှိခဲ့ပါတယ်။
စစ်ကောင်စီရဲ့ မိုးလေဝသနဲ့ ဇလဗေဒညွှန်ကြားမှုဦးစီးဌာနရဲ့ ထုတ်ပြန်ချက်အရ ရှမ်းပြည်နယ်အပါအဝင် နိုင်ငံတဝန်းမှာ မိုးဆက်လက်ကြီးနိုင်တယ်လို့ ဒီနေ့ ဇူလိုင် ၂၀ ရက်မှာ သတိပေးထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
