ဝတ်ရည်၊ ဇူလိုင် ၂၀ ရက်၊ တောင်ကုတ်
မနေ့ ဇူလိုင် ၁၉ ရက် အာဇာနည်နေ့တစ်ရက်ထဲမှာတင် စစ်ကောင်စီတပ်က အာရက္ခတပ်တော်-AA ထိန်းချုပ်ထားတဲ့ မြို့နယ် ၃ ခုကို လေကြောင်းကနေ ဗုံးကြဲတိုက်ခိုက်လို့ ဒေသခံ ၅ ဦးသေဆုံးပြီး သံဃာတော်အပါအဝင် ၂၉ ဦး ဒဏ်ရာရရှိခဲ့တယ်လို့ AA က သတင်းထုတ်ပြန်ထားပါတယ်။
မနေ့ ဇူလိုင် ၁၉ ရက် မနက် ၁၁ နာရီခွဲမှာ တောင်ကုတ်မြို့နယ် မအီမြို့ အမှတ် (၂) ရပ်ကွက်နဲ့ အမှတ် ၃) ရပ်ကွက်ကို စစ်ကောင်စီတပ်က ဂျက်ဖိုက်တာနဲ့ ပေါင် ၃၀၀ ဗုံး ၃ လုံးကြဲတိုက်ခိုက်ခဲ့တာကြောင့် ဒေသခံ ၅ ဦးသေဆုံးပြီး သံဃာတော် ၁ ပါးနဲ့ ကလေးငယ်အပါအဝင် ၂၂ ဦး ဒဏ်ရာရရှိခဲ့ကာ နေအိမ် ၂၀ လုံးပျက်စီးခဲ့တာလို့ ဆိုပါတယ်။
ဒါ့အပြင် မနေ့ ဇူလိုင် ၁၉ ရက်မှာတင် ညနေ ၄ နာရီမှာ သံတွဲမြို့အတွင်းကို ဂျက်ဖိုက်တာနဲ့ ၅ ကြိမ်တိုင်တိုင် နာရီဝက်ကြာ တိုက်ခိုက်တဲ့အပြင် စက်သေနတ်တွေအပါ တိုက်ခိုက်ခဲ့လို့ ဒေသခံ ၄ ဦး ဒဏ်ရာရရှိခဲ့ပြီး နေအိမ်တချို့ ပျက်စီးခဲ့ပါတယ်။
အလားတူ ဇူလိုင် ၁၉ ရက် ညနေ ၆ နာရီခွဲမှာလည်း ပုဏ္ဏားကျွန်းမြို့နယ် ရေပေါက်ချောင်းခွဆုံ၊ တောင်ပေါက်ကျေးရွာဘုန်းကြီးကျောင်း အနီးကို ဂျက်ဖိုက်တာ (၁) စီးနဲ့ ပေါင် (၃၀၀) ဗုံး နှစ်လုံး ကြဲချတိုက်ခိုက်ခဲ့တာကြောင့် သံဃာတော် ၂ ပါးနဲ့ ဒေသခံ ၁ ဦးတို့ ဒဏ်ရာရရှိခဲ့ကြတာလို့ AA က ဆိုပါတယ်။
ဇူလိုင် ၁၉ ရက် တစ်ရက်တည်းအတွင်း စစ်ကောင်စီတပ်ဟာ AA ထိန်းချုပ်နယ်မြေက မြို့ ၃ မြို့ကို လေကြောင်းကနေ တိုက်ခိုက်လို့ ဒေသခံ ၅ ဦးသေဆုံးပြီး သံဃာတော် ၃ ပါးအပါအဝင် ဒေသခံ ၂၉ ဦး ဒဏ်ရာရရှိခဲ့ပါတယ်။
AA အနေနဲ့ စစ်ကောင်စီတပ်ရဲ့ ထိုးစစ်တွေကို အာရက္ခဒေသခံနဲ့ အတူ မိမိတို့ ယုံကြည်အားပေးတဲ့ အဖွဲ့အစည်း၊ လူပုဂ္ဂိုလ်တွေနဲ့ နယ်မြေချင်းထိစပ်နေတဲ့ မိတ်ဖက်အဖွဲ့အစည်းနဲ့ ပူးပေါင်းကာ ဆက်လက်တုံ့ပြန်သွားမယ်ဖြစ်ကြောင်း သတိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
