ရွှေဖီမြေ၊ ဇူလိုင် ၁၀ ရက်၊ လားရှိုး
စစ်ကောင်စီထိန်းချုပ်ထားတဲ့ ရှမ်းမြောက် လားရှိုးမြို့မှာ ရှော့တိုက်ဒုံးနဲ့ ပစ်ခတ်တိုက်ခိုက်ခံရပြီးနောက် တိုက်ပွဲဖြစ်လာမှာကို စိုးရိမ်တာကြောင့် မြို့ခံတွေ ဆီအလုအယက် ဝယ်ယူနေကြတယ်လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“အခြေအနေက ဘာဖြစ်မှန်းမသိတော့ ဒီနေ့ ဆီတန်းပြီး ဝယ်နေကြတယ်။ ဆီတန်းတဲ့သူတွေ မြို့ပြင် မုခ်ဦးအထိ ရှိတယ်။ တချို့ တရုတ်တွေကတော့ ပြောင်းသွားကြတာရှိတယ်” လို့ ဆိုပါတယ်။
ဒါ့အပြင် ရှော့တိုက်ဒုံးနဲ့ ပစ်ခတ်တိုက်ခိုက်ခံရပြီးနောက် လားရှိုးမြို့ အဝင်အထွက်တွေကို စစ်ကောင်စီတပ်ဘက်က လုံခြုံရေး တင်းကြပ်ထားတယ်လို့ လားရှိုးမြို့ခံတွေက ဆိုပါတယ်။
မနေ့က ဇူလိုင် ၉ ရက် ညနေပိုင်းမှာ လားရှိုးမြို့ ရပ်ကွက် (၆)၊ (၉)၊ (၁၀) နဲ့ အရှေ့မြောက်တိုင်းစစ်ဌာနချုပ်ထဲကို ရှော့တိုက်ဒုံး ၄ လုံး ပစ်ခတ်ခံရပြီး အမျိုးသမီးတစ်ဦး သေဆုံးကာ နောက်အမျိုးသမီးတစ်ဦး ထိခိုက်ဒဏ်ရာ ရရှိခဲ့ပါတယ်။
ဒီတိုက်ခိုက်မှုကို ဘယ်အဖွဲ့က လုပ်ဆောင်တယ်ဆိုတာ မသိရသေးဘဲ စစ်ကောင်စီတပ်ဘက်ကလည်း တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
လားရှိုးမြို့တွင်းကို စစ်ကောင်စီက ထိန်းချုပ်ထားပြီး မြို့ပြင်က နေရာတွေကိုတော့ ကိုးကန့်တပ် MNDAA က ထိန်းချုပ်ထားတာ ဖြစ်ပါတယ်။
လားရှိုးမြို့ကို စစ်ကောင်စီတပ်က တရုတ်နိုင်ငံရဲ့ အကူအညီနဲ့ ပြန်လည်ထိန်းချုပ်ပြီးနောက် လားရှိုးမြို့တွင်းမှာ ရှော့တိုက်ဒုံးနဲ့ ပစ်ခတ်တိုက်ခိုက်ခံရမှု ၃ ကြိမ်ထက်မနည်း ရှိပြီလို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
