ယာရူစိင်၊ ဇွန်လ ၂၇ ရက်၊ နောင်ချို
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် နောင်ချိုမြို့နယ်မှာ မပေါက်ကွဲသေးတဲ့ လက်နက်ကြီးကို ခုတ်မိရာကနေ ပေါက်ကွဲလို့ အမျိုးသားတစ်ဦး ပြင်းထန်ဒဏ်ရာ ရရှိခဲ့တယ်လို့ ဖြစ်စဉ်သိရှိထားသူ အမျိုးသားတစ်ဦးက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ ဇွန်လ ၂၃ ရက် နေ့လယ် ၁ နာရီဝန်းကျင်မှာ နောင်ချိုမြို့နယ် ဉာဏ်တောရွာက အမျိုးသားဟာ လယ်ယာ ရှင်းရာကနေ လက်နက်ကြီး ၁ လုံး ခုတ်မိခဲ့တာကြောင့် ပေါက်ကွဲမှု ဖြစ်ပွားခဲ့တာလို့ ဆိုပါတယ်။
“ဘယ်လိုလက်နက်အမျိုးအစားဆိုတာတော့ မသိဘူး။ သူရဲ့ လက်အပါ မျက်နှာနဲ့ ဗိုက်တွေ လက်နှစ်ဖက်လုံး ထိခိုက်သွားတာ။ ဒဏ်ရာတွေက တော်တော်ဆိုးတဲ့အထဲ ပါတယ်။ အခုတော့ ဆေးရုံကနေ မဆင်းရသေး ဆေးရုံ တက်ရတုန်း”
ထိခိုက်ဒဏ်ရာ ရရှိထားတဲ့ မောင်မင်းသစ်ဦးဟာ လက်ရှိအချိန်ထိ ပြင်ဦးလွင်ဆေးရုံမှာ ကုသမှု ခံယူနေရပြီး ဆေးကုသမှုအတွက် အကူအညီ လိုအပ်နေတယ်လို့ သိရပါတယ်။
နောင်ချို ဒေသခံတွေဟာ ခြံရှင်းရင်း မိုင်းနင်းမိတာ၊ အလုပ်သွားရင်း မိုင်းနင်းမိတာနဲ့ နေအိမ်ခြံဝန်းအတွင်း ရှင်းလင်းရင်း မိုင်းနင်းမိတာတွေ ဆက်တိုက်ဆိုသလို ရှိနေတာကြောင့် သက်ဆိုင်ရာ တာဝန်ရှိသူတွေအနေနဲ့ မိုင်းရှင်းလင်းရေးလုပ်ငန်း လုပ်ဆောင်ပေးကြဖို့ ဒေသခံတွေက တောင်းဆိုနေကြပါတယ်။
ရှမ်းမြောက်မှာ ၂၀၂၆ ခုနှစ် ဇန်နဝါရီကနေ ဇွန်လ ၂၇ ရက်အထိ ၅ လကျော်အတွင်း ရွှေဖီမြေ ပြုစုထားတဲ့ စာရင်းအရ မြေမြှုပ်မိုင်းတွေကြောင့် ကလေးတစ်ဦးအပါအဝင် ၃ ဦး သေဆုံးခဲ့ပြီး ၂၂ ဦး ထိခိုက်ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
