ရွှေဖီမြေ၊ ဇွန်လ ၂၇ ရက်၊ သီပေါ
စစ်ကောင်စီထိန်းချုပ်မှုအောက်မှာရှိတဲ့ ရှမ်မြောက် သီပေါမြို့နယ် စံဖိတ်ကျေးရွာအုပ်စုမှာ အသက် ၁၄ နှစ်အရွယ် အမျိုးသမီးငယ်တစ်ဦးကို ၂၃ နှစ်အရွယ် အမျိုးသားတစ်ဦးက အဓမ္မပြုကျင့်ပြီး သတ်ဖြတ်ခဲ့တယ်လို့ ရှမ်းပြည်တိုးတက်ရေးပါတီ- SSPP ရဲ့ ထုတ်ပြန်ချက်အရ သိရပါတယ်။
ကျူးလွန်သူ အမျိုးသားဟာ စိုင်းစံဆိုသူဖြစ်ပြီး ၁၄ နှစ်အရွယ်သာ ရှိသေးတဲ့ ညီမဝမ်းကွဲဖြစ်သူကို ပြီးခဲ့တဲ့ ဇွန်လ ၂၅ ရက်က ရွာအပြင်ဘက် အလည်ခေါ်သွားကာ ဘော်ကြိုကျေးရွာအုပ်စု နမ့်ဟူးနွဲ့ရွာအနီးမှာရှိတဲ့ ငှက်ပျောခြံအရောက်မှာ အဓမ္မပြုကျင့်ခဲ့တာလို့ SSPP ထံ ထွက်ဆိုထားပါတယ်။
ဒါ့အပြင် ညီမဝမ်းကွဲဖြစ်သူကို အဓမ္မပြုကျင့်ပြီးတဲ့နောက် လည်ပင်းကိုညှစ်တာ၊ ပုလင်းကွဲနဲ့ လည်ပင်း၊ ဝမ်းဗိုက်တို့ကို အကြိမ်ကြိမ်ထိုးသတ်ကာ သေဆုံးပြီးနောက် အလောင်းကို ငှက်ပျောရွက်တွေနဲ့ ဖုံးအုပ်ကာ အလောင်း ဖျောက်ခဲ့တယ်လို့ ဖော်ပြထားပါတယ်။
လက်ရှိမှာတော့ ကျူးလွန်ခံရတဲ့ အမျိုးသမီးငယ် မိဘရဲ့ တိုင်ကြားချက်ကြောင့် စိုင်းစံကို SSPP က ဖမ်းဆီးထားပြီး အမှုကို SSPP ရဲ့ တရားဥပဒေအရ စစ်ဆေးအရေးယူသွားမယ်လို့ ထုတ်ပြန်ထားပါတယ်။
ကိုးကန့်တပ် -MNDAA ရဲ့ ဥပဒေအရ အဓမ္မပြုကျင့်သတ်ဖြတ်မှု ကျူးလွန်တဲ့ တရားခံကို သေဒဏ် စီရင်တာ ခံရနိုင်သလို တအာင်းတပ်- TNLA ရဲ့ ဥပဒေအရတော့ အလုပ်ကြမ်းနဲ့ ထောင်ဒဏ် တစ်သက်တစ်ကျွန်း ချမှတ်ခံရနိုင်ပြီး ကျူးလွန်သူကို SSPP က ဘယ်လို တရားစီရင်မလဲဆိုတာတော့ မသိရသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
