ရွှေဖီမြေ၊ ဇွန်လ ၂၁ ရက်၊ တမူး
စစ်ကိုင်းတိုင်း ကလေး-တမူးလမ်းကြောင်းပေါ်ရှိ အမျိုးသားညီညွတ်ရေးအစိုးရ- NUG က ၂ နှစ်ကျော်ကြာ ထိန်းချုပ်ခဲ့တဲ့ တမူးမြို့နယ်ထဲက ခမ်းပတ်မြို့ကို ပြန်လည်ထိန်းချုပ်နိုင်ခဲ့ပြီလို့ စစ်ကောင်စီက မနေ့ ဇွန်လ ၂၀ ရက်မှာ ထုတ်ပြန်ပါတယ်။
ခမ်းပတ်မြို့ကို ပြန်လည်ရရှိဖို့ စစ်ကောင်စီတပ်ဟာ ပြီးခဲ့တဲ့ ဇွန်လ ပထမအပတ်ကစပြီး ကလေး-တမူးလမ်းပိုင်းကနေ ထိုးစစ်ဆင်တိုက်ခိုက်လာတာဖြစ်ပြီး ဇွန်လ ၂၀ ရက်မှာ ခမ်းပတ်မြို့ကို ပြန်လည်ထိန်းချုပ်နိုင်ခဲ့တယ်လို့ ဆိုပါတယ်။
ခမ်းပတ်မြို့ဟာ အိန္ဒိယ-မြန်မာနယ်စပ်ကုန်သွယ်ရေးအတွက် အရေးပါတဲ့ မြို့ဖြစ်ပြီး NUG နဲ့ ပူးပေါင်းတပ်တွေဘက်က ပြီးခဲ့တဲ့ ၂၀၂၃ ခုနှစ် နိုဝင်ဘာလမှာ ထိန်းချုပ်နိုင်ခဲ့တာ ဖြစ်ပါတယ်။
စစ်ခေါင်းဆောင် မင်းအောင်လှိုင်ရဲ့ အိန္ဒိယခရီးစဉ်မှာ မြန်မာ-အိန္ဒိယ-ထိုင်း သုံးနိုင်ငံကုန်သွယ်ရေးနယ်စပ် ပြန်ဖွင့်မယ်လို့ ပြောဆိုပြီးနောက် ကလေး-တမူးလမ်းပိုင်းကို စစ်ကောင်စီက ထိုးစစ်ဆင်တိုက်ခိုက်လာတာ တွေ့ရပါတယ်။
NUG တပ်ဘက်ကတော့ ခမ်းပတ်မြို့ကို လက်လွှတ်ခဲ့ရတာနဲ့ ပတ်သက်ပြီး တစုံတရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ၂၀၂၅ ခုနှစ်ကုန်စလို့ စစ်ကောင်စီတပ်ဟာ ၎င်းလက်လွှတ်ထားရတဲ့ နယ်မြေတွေကို ထိုးစစ်ဆင်မှုတွေ ဆက်တိုက်ပြုလုပ်ပြီး တော်လှန်ရေးအင်အားစုတွေဘက်က နယ်မြေတွေ ဆက်တိုက်လက်လွှတ်နေရတာတွေ ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
