ရွှေဖီမြေ၊ ဇွန်လ ၁၉ ရက်
အမျိုးသားညီညွတ်ရေးအစိုးရ- NUG ရဲ့ လက်အောက်ခံတပ်က ဖမ်းဆီးထားတဲ့ ဒေသကာကွယ်ရေးတပ် စစ်ကိုင်း PDF ရဲ့ ကွပ်ကဲရေးမှူး ကိုစစ်ငြိမ်းနိုင်နဲ့ ၄ ရက် ကြာတဲ့အထိ အဆက်အသွယ် မရသေးကြောင်း မိသားစုဝင်တစ်ဦးက ရွှေဖီမြေကို ပြောပါတယ်။
ကိုစစ်ငြိမ်းနိုင်နဲ့ ရဲဘော် ၃ ဦးဟာ မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး- ABSDF ဖိတ်ကြားထားတဲ့ ဆွေးနွေးပွဲတစ်ခုကို သွားရောက်ပြီးအပြန် NUG ရဲ့ အမှတ်(၁) စစ်ဒေသမှူးက တွေ့ဆုံလိုကြောင်း ပြောဆိုပြီး ခေါ်ဆောင်သွားရာကနေ ဇွန်လ ၁၆ ရက်ကနေ ဒီနေ့ ဇွန်လ ၁၉ ရက်အထိ မိသားစုနဲ့ အဆက်အသွယ် ပြတ်တောက်နေတာ ဖြစ်ပါတယ်။
ကိုစစ်ငြိမ်းနိုင်ကို ဘယ်မှာ ထိန်းသိမ်းထားတယ်ဆိုတာနဲ့ ဘာအမှုနဲ့ဖမ်းဆီးထားတယ်ဆိုတာ မသိရသေးဘူးလို့ မိသားစုဝင်တစ်ဦးက ရွှေဖီမြေကို ပြောပါတယ်။
“အဓိကတော့ သူ့ကို ဆွေးနွေးပွဲဖိတ်တဲ့ ABSDF ဘက်ကရော၊ အာမခံပြီး သူ့ကို ခေါ်သွားတဲ့သူတွေရော ပြန်မလွှတ်ရင်တောင် သူ့ကို ဘာကြောင့် ဖမ်းထားတယ်ဆိုတာ သိချင်တယ်။ သူ့ရဲ့ လုံခြုံရေးလည်း စိုးရိမ်ရတယ်။ အခုအချိန်ထိ ဘာအဆက်အသွယ်မှ မရဘူး”
ကိုစစ်ငြိမ်းနိုင် ဖမ်းဆီးခံထားရတာနဲ့ ပတ်သက်ပြီး NUG ဘက်ကလည်း လက်ရှိအချိန်ထိ တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
စစ်ကိုင်း PDF ဟာ ပြီးခဲ့တဲ့ ၂၀၂၁ ခုနှစ်မှာ ဖွဲ့စည်းခဲ့တဲ့ ဒေသကာကွယ်ရေးတပ်ဖြစ်ပြီး စစ်ကိုင်းတိုင်းက တိုက်ပွဲတွေအပါအဝင် ၁၀၂၇ စစ်ဆင်ရေးမှာလည်း မဟာမိတ်တပ်တွေနဲ့ ပါဝင်တိုက်ခိုက်ခဲ့ပါတယ်။
နွေဦးတော်လှန်ရေး မဟာမိတ်တပ်ပေါင်းစု- SRA ရဲ့ အဖွဲ့ဝင်ဖြစ်တဲ့ စစ်ကိုင်းတိုင်း မင်းကင်းမြို့နယ်အခြေစိုက် ကျောင်းသားလက်ရုံး တော်လှန်ရေးတပ်တော်- SRF ရဲ့ ခေါင်းဆောင်ကိုလည်း NUG ရဲ့ လက်အောက်ခံတပ်က ဖမ်းဆီးခဲ့တဲ့ဖြစ်စဉ်လည်း ရှိခဲ့ဖူးပါတယ်။
NUG ရဲ့ ကွပ်ကဲမှုအောက် မရှိတဲ့ တော်လှန်ရေးတပ်ဖွဲ့တွေကို အခုလို ဖမ်းဆီးမှုတွေ ပြုလုပ်နေတဲ့အပေါ် တော်လှန်ရေး အင်အားစုတွေဘက်က ဝေဖန်မှု ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
