ပိုႈလဘား၊ ကျံရ်ဇူန် ဆငည်း 19၊ မူစယ်
ဘိူန်းအယ်နံပ်မိုႈတ ငံရ်ကဆူမ်းဟာဝ်း KTV အီဂေါည်ပကီုင်းမူစယ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲအောႏ။
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းတဆျှိုည်ဖီမျေဒါႈ ငံရ်ကဆူမ်းဟာဝ်း ဆဴင် KTV နဂါးနှစ်ကောင် အီဂေါည်ရီမ်းပြောဆင်ဖြူပေါက် ကီုင်းမူစယ်နီန် အဒိူဝ်ကျံရ်ဇူန် ဆငည်း 19 ခိင်ညှာ ကပံတ် 8နြီလေႈအူကဒည်ဒိူန်အောႏ။
“ငံရ်ဇူႈကဆူမ်း ဆီုင်ခည်ခိင်ညှာ 8နြီလေႈဒိူန်။ မောကံပ်ရောတ်ကဇေန်နီး ကဲဆီုင်ဒါ့်ပျံတ်အူန်းငံရ်။ ဒီမှောအ်ုန်ဇူႈဒေကဆူမ်းမာ် အာဝ်နံပ်စိ။ အီးဒါႈအူန်း မိုႈတယိူဝ်ႇတဂဲတ်ငံရ်ပဒူႈ စီကဆူမ်းဟာဝ်း။ ခေဲင်ႎှါင်းဒီန်မာ် မိူဝ်ႈအူန်းတိုအီး”
ဖုင်ဇီုင်းပျံတ်ငံရ်ကဲ ဟည်ဒေဲႈပျံတ်ဖါ်ႈငံရ် ပဒီကဆူမ်းဟာဝ်းဒီန် ဆာ်မိုႈထာန်ချှူမ်ဟာဝ်းကဲနီန် ညှံမ်နံပ်စိအောႏ။
ခည်ကျံရ်မေ ဆငည်း 27ဒိူန်မာ် ငံရ်ကဆူမ်းဒေဲႈ ဂိုဒေါင်ယုင်ပ္လေ အီဂေါည်ပရဝ်လော်ည်လံမ့် လှံင်လာဆေဝ်နီန်အူလှေအောႏ။
တောပ်ပည်စြာင်းပ်ုန်ကစုအူန်း ဖုင်ယဲဆျှိုည်ဖီမျေ ဇူႈပွံတ်ကျံရ်ဇံန်နႎရီ ရောတ်ဘံင်ခေဲင်ကျံရ်မေနီန် ငံရ်ဟည်ကဆူမ်းဟာဝ်း ခေဲင်မာဝ်းႎံင်း၊ လာဆေဝ်၊ အိုမ်ငျံရ်ကဲနီန် 9လိူဝ်ႈ ငံရ်ကဆူမ်းဟောမ်ဒိုႇ ကျောင်စဝ်အူကျောင်ကာည်း ဂါင်ဂေါည် 8ကြောင်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
