ခိုင်လေး၊ ဇန်နဝါရီ ၂၉ ရက်၊ မူဆယ်
စစ်ကောင်စီတပ် ထိန်းချုပ်တဲ့ မူဆယ်မှာ အမျိုးသားသုံးဦးက စမတ်ကတ် သွားယူပြီး ပြန်လာတဲ့ အမျိုးသားတစ်ဦးကို ဓားနဲ့ ထိုးခဲ့တယ်လို့ မူဆယ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဇန်နဝါရီ ၂၈ ရက်က မူဆယ်မြို့ စွမ်စော်ရပ်ကွက် ၁ လမ်းမှာ အသက် ၃၉ ဝန်းကျင်ရှိ ဦးရွှေမောင်ဆိုသူဟာ ဝဲဘက်နံရိုးမှာ ဓားထိုးဒဏ်ရာ ရရှိခဲ့တာပါ။
“သူ့ရဲ့ အမျိုးတွေကို အကြောင်းကြားထားတော့ သူတို့က လာကြည့်တယ်။ သူ့ရဲ့မိသားစုဆီကို အပ်လိုက်ပြီ။ သူ နမ့်ခမ်းဆေးရုံမှာ ဆေးကုသမှု ခံယူနေတယ်”
ပြီးခဲ့တဲ့ ဇန်နဝါရီ ၂၇ ရက်က မူဆယ် လွယ်ကီလောက်တောင်မှာ အထိုင်ချထားတဲ့ စစ်တပ်က မူးယစ်ဆေးဝါး အရောင်းအဝယ် လုပ်နေတဲ့ နမ့်ကတ်အုပ်စု မိုင်းဆက်ရွာမှာ နေထိုင်တဲ့ တာအိုက်ကျန်း ဆိုသူကို ဖမ်းဆီးထားတာလည်း ရှိတယ်လို့ ဆိုပါတယ်။
ဆွေမျိုးက စစ်တပ်ကို တရုတ်ငွေ ယွမ် ၁ ထောင် (၆ သိန်းကျပ်)ပေးပြီးမှာ ပြန်လွှတ်ပေးကာ ၎င်းနဲ့အတူ သိမ်းဆည်းထားတဲ့ ဖုန်းနဲ့ဆိုင်ကယ်ကိုလည်း မနေ့ညမှာ ပြန်ပေးခဲ့တယ်လို့ သူက ဆက်ပြောပါတယ်။
မူဆယ်မြို့ဟာ တရုတ်-မြန်မာနယ်စပ်ကုန်သွယ်ရေးမြို့ဖြစ်ပြီး တရားမဝင်လုပ်ငန်း ပေါများတဲ့ဒေသ ဖြစ်တာကြောင့် ဓားထိုးမှု၊ သေနတ် ပစ်ခတ်မှု၊ ဓားပြတိုက်မှုနဲ့ ပြန်ပေးဆွဲမှု မကြာခဏ ဖြစ်ပွားတဲ့နေရာလည်း ဖြစ်ပါတယ်။
