စိန်၊ ဇွန်လ ၁၅ ရက်၊ ဖားကန့်
ကချင်ပြည် ဖားကန့်မြို့နယ်က ရပ်ကွက်တချို့တွေမှာ မိုးကြီးတာကြောင့် ရေကြီးတာတွေ ဖြစ်နေတယ်လို့ ဖားကန့်မြို့ခံတစ်ဦးက ရွှေဖီမြေကို ပြောပါတယ်။
မနေ့ ဇွန်လ ၁၄ ရက်ကစပြီး မိုးဆက်တိုက် ရွာသွန်းနေတာကြောင့် ဖားကန့်က ငှက်ပျောတောနဲ့ အေးမြသာယာရပ်ကွက်တွေမှာ ရေကြီးနေပြီး ဒီနေ့ ဇွန်လ ၁၅ ရက်အထိလည်း မိုးက ဆက်လက်ရွာနေဆဲလို့ ဆိုပါတယ်။
“မိုးက ၃ ရက်လောက်ကတည်း ဆက်တိုက်ရွာနေတာ။ မိုးက အခုထိ ရွာနေတုန်းပဲ။ မရှီထောင်ဘက်လည်း နစ်တယ်။ ပြီးတော့ အေးမြသာယာကျောက်ဝိုင်းနဲ့ လုံးခင်းဘက်က မြေနိမ့်ပိုင်းတွေမှာလည်း နစ်တယ်။ ဆုံးရှုံးမှုတွေလည်း ရှိကြတယ်” လို့ ဖားကန့်မြို့ခံက ပြောပါတယ်။
မိုးဆက်တိုက်ရွာသွန်းပြီး ရေတွေဆက်တက်နေဆဲဖြစ်တာကြောင့် ရေကြီးမှုဖြစ်နေတဲ့ ရပ်ကွက်နေအိမ်နဲ့ ချောင်းဘေးတွေမှာ နေထိုင်ကြတဲ့ ဒေသခံတွေအနေနဲ့က ပြောင်းရွှေ့နေထိုင်ကြဖို့ လိုအပ်တယ်လို့ ဆိုပါတယ်။
မြန်မာ့မိုးလေဝသ ခန့်မှန်းပေးနေတဲ့ ဒေါက်တာစိုင်းခွန်အာကာကတော့ ကချင်ပြည်နယ်အပါအဝင် ပြည်နယ်နဲ့တိုင်းတွေမှာ ၄၈ နာရီအတွင်း မိုးဆက်လက်ရွာသွန်းဖို့ ရှိနေပြီး ကချင်ပြည်နယ်နဲ့ စစ်ကိုင်းတိုင်းအထက်ပိုင်းမှာ လာမယ့် ဇူလိုင်လထဲ ရွာသွန်းမြဲထက် သုံးဆကနေ လေးဆအထိ ရွာနိုင်ကြောင်း ခန့်မှန်းထားပါတယ်။
အခုလို မိုးသည်းထန်စွာ ရွာသွန်းမှုကြောင့် ရှမ်းမြောက် တန့်ယန်းမြို့မှာလည်း ပြီးခဲ့တဲ့ ဇွန်လ ၈ ရက်မှာ အုတ်တံတိုင်းပြိုကျမှု ဖြစ်ပွားခဲ့ရာ အသက် ၄၉ နှစ်အရွယ် အမျိုးသမီးတစ်ဦး မြေပိ သေဆုံးခဲ့တာပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
