လွေးထွေး၊ ဇန်နဝါရီ ၂၉ ရက်၊ မူဆယ်
တရုတ်-မြန်မာ နယ်စပ်ဂိတ်ဖြစ်တဲ့ ကျင်စန်းကျော့ဂိတ်ဟာ နိုင်ငံရေးအခြေအနေကြောင့် ပြန်ပိတ်မှာကို စိုးရိမ်ကြလို့ ကြံတောင်သူတချို့က တရုတ်ပြည်ထဲ ကြံတွေကို အလုအယက် တင်ပို့ခဲ့ကြတယ်လို့ ၁၀၅ မိုင် ဒေသခံတစ်ဦးရဲ့ ပြောပြချက်အရ သိရပါတယ်။
ပြီးခဲ့တဲ့ ဇန်နဝါရီ လဆန်းကတည်းက ကြံစိုက်တောင်သူတချို့က ခုတ်ယူလို့ရပြီဖြစ်တဲ့ ကြံကို ခုတ်ကြပြီး တရုတ်နှစ်သစ်ကူး မတိုင်ခင် ဂိတ်ပိတ်မှာကို စိုးရိမ်တာနဲ့ နိုင်ငံရေး မတည်ငြိမ်မှုကြောင့် ဂိတ်ပိတ်မှာကို စိုးရိမ်လို့ တင်ပို့ခဲ့ကြပါတယ်။
ကြံတောင်သူ အမျိုးသားတစ်ဦးက “အခုကတော့ နှစ်သစ်ကူးဆိုတော့ ခဏပိတ်ထားတယ်။ လကုန်ပြီး တစ်ရက် နှစ်ရက်နေမှ ပြန်ဖွင့်မယ်ကြားတယ်။ ပြီးခဲ့တဲ့ ရှေ့အပတ်တွေကဆို ဒီကလူတွေက အလုအယက်ဘဲ ခုတ်ကြတယ် ပို့ကြတယ်။ ဂိတ်ပိတ်မှာ ကြောက်ကြတာလဲပါတယ်။ နှစ်သစ်ကူးပြီးရင် ဈေးကျမှာလည်း ကြောက်ကြလို့” ဆိုပြီး ပြောပါတယ်။
လက်ရှိ ကြံဈေးဟာ တရုတ်ပြည်ထဲ တစ်တန်ကို ယွမ် ၃၇၀ ရပြီး ပြည်တွင်းထဲက စက်ရုံတွေမှာတော့ တစ်တန်ကို ၃၂၀ ယွမ် ပေါက်ဈေး ရှိနေတယ်လို့ ဆိုပါတယ်။
မြန်မာဘက်က ပို့ကုန်တွေကိုသာ တရုတ်ဘက်က လက်ခံတာဖြစ်ပြီး တရုတ်နိုင်ငံဘက်ကတော့ ဘယ်ကုန်ပစ္စည်းကိုမှ မြန်မာဘက် သယ်ယူခွင့် မပြုသေးကြောင်း နောက်ထပ် ကြံကုန်သည်တစ်ဦးက ပြောပါတယ်။
ကျင်စန်းကျော့ဂိတ်ကို ၁၀၂၇ စစ်ဆင်ရေး ပထမလှိုင်းကတည်းက ညီနောင်မဟာမိတ် သုံးဖွဲ့က သိမ်းပိုက်ထိန်းချုပ်ထားတာဖြစ်ပြီး ပြီးခဲ့တဲ့ ၂၀၂၄ ခုနှစ် နိုဝင်ဘာ ၂၁ ရက်မှာ တရုတ်ဘက်က ပြန်ဖွင့်ပေးလိုက်တာ ဖြစ်ပါတယ်။
