ဝတ်ရည်၊ ကျံရ်ဇူန် ဆငည်း 12၊ မူစယ်
တိုအီးအရာပ်ကဲ က္လာင်းတဖုင်ဆျှိုည်ဖိမျေဒါႈ အ်ုန်အီမိုႈ ဒီထိင်ခြဲ တံပ်ကညာအာဏာဆီုက်ဇေဝ်ကဲ ပကပီုန်ဆျှံမ်ကဒါႇပိူည် ဒီကစာပ်ကုင်ခယ် – ကုင်ကပိုမ်ဘြာန် ပကုင်မူစယ်နီန် အ်ုန်ပဲန်ကစာပ်ဖါ်ႈ အမှုစိုန် ကာည်း အမှုကဖါ်ႇနီန် ဂေါႇဘည်ဒီန် တိုအီးကဲအီဂေါည်ခေဲင်ကီုင်းကဲနီန်ဒါႈအာဝ်မိူဝ်ႈယာ့် လံပ်ကတ်ုမ် ကနာည်ကဲအောႏ။
ခည်ကျံရ်ဇူန် ဆငည်း 8 ကပံတ်ဘံန်ဆံန်ဒိူန်မာ် အ်ုန်ပဲန်ဟာဝ်းဖါ်ႈ အမှုစိုန်အူလှေ အာဝ်လှေင်စိ ဘံန်ရောတ်စူန်အံပ်နီန် ကောန်အီပ်ုန်ကောန်ခယ်အူအီး ကဝ်အီဒေဲႈယံင်း ယေခဲချောင်း ပမူစယ်နီန် ကတူႈဖါ်ႈအီဖါ်ႇဟာဝ်း ရိူန်းအ်ုန်အောႏ။
ကောန်အီမာည်း တိုအီးကီုင်းမူစယ်အူအီး က္လာင်းဒါႈ “ အ်ုန်ယံင်းယေခဲချောင်းနီန်။ တိုအီးကဲအီဖါ်ႇမိုႈ ကဲဒါဆဲင်ကယ်ဖါ်ႇဟာဝ်း။ ကဲဒါႈရိူန်းအယ်တောပ်ဟာဝ်း 20 ဆဲန်။ ဆာ်မိုႈပလိက်ကဲဒါႈ အ်ုန်မိုႈလိူည် ရိူန်းခယ် 200 ကဲဒါႈ။ ပမူစယ်နီန် ကံပ်နှေရ်ပဲန်တောန်ဆငည်း။ မိုႈလိူည်ဆဒါင် အာဝ်ဟိုက်အီစီအာဝ်နံပ်”။
တိုအီးကီုင်းကဲက္လာင်းဒါႈ အာဝ်နံပ်ဆေချာစိ ထာန်ဖါ်ႇဟာဝ်းကဲတ ရိူန်းဒီန် ကောန်အီပ်ုန်ဒီန် ဘိုည်ဟြာင်းက္လာင်းတ ဖုင်ပလိက်ကဲမာ် ကံပ်ရောတ်အဒိူဝ်နီန် အာဝ်မိူဝ်ႈစိ ဘည်ဘယ်ကဲတ ဒေတိူဝ်ႈလာည်းအရေးအောႏ။
ခည်ကျံရ်ဇူန် ဆငည်း 8 ဒိူန်မာ် အူပီးအူမေန်း အ်ုအီဂေါည်ပမူစယ်နီန် ခေဲင်ဇံင်တောင်ရပ် ကဲအီကဇိူရ်ႈကယံင်းခြီရ်နီန် ကတူႈကောန်အီမာည်း 4 အီး ထာ့်ဖါ်ႈဆနာတ်တတိုဂါရ် စိုန်ဟာဝ်းအောႏ။
ခေဲင်အမှုစိုန်ဒီန် ကဲဘိူည်ဒါႈ အ်ုန်တောပ်ဟာဝ်း ခြီရ်ဒီန် ခည်ဂီုန်းမာ် ကဆီုဝ်ဖုင်ယဲဆျှိုည်ဖီမျေ အာဝ်ဘယ်စိပ္လ ဒါႈအ်ုန်မိုႈဘည်ဒီန်အောႏ။
တိုအီးအရာပ်ကဲ က္လာင်းတဖုင်ဆျှိုည်ဖီမျေဒါႈ ပမူစယ်နီန် တောပ်ပည် အမှုစိုန်၊ အမှုကဖါ်ႇ၊ အမှုရံပ်တိုည်းလာည်းရိူန်းကဲနီန် အ်ုန်ကံပ်ဘာည်းလိူည်ထုင်အူလှေ ခေဲင်အမှုဒီန် ဆီုက်ရဝ်ကဲအီဘားလာက်နာက်နီန်မာ် တောပ်ဖါ်ႈ ပမူစယ်နီန်ကဲဒါႈ အာဝ်မိုႈစိမျိုးအီလှာက်အောႏ။
ဆဲႈဒါႇအ်ုန်အီမိုႈ ကီုင်းပ်ုန်ထိင်ခြဲ တံပ်ကညာအာဏာဆီုက်ဇေဝ်ကဲ ပကီုင်းမူစယ်၊ လာဆေဝ်၊ တာချီလိတ်၊ ကျိုင်းတုံ၊ တာန်ယာန်ကဲနီန် ပကီုင်းကဲဟံရ်မာ် ကဲအီဒါခံင်မဝ်း ကာည်း ဘည်ကဇိူရ်ႈကယံင်းခံင်မဝ်း ကာည်း ပါင်ကတော်ကဲနီန် ဂီုန်းဒေဲႈဖါ်ႈ အ်ုန်အီမိုႈ အမှုဘြား၊ အမှုစိုန်၊ အမှုကဖါ်ႇကဲနီန် ဂေါည်ဂေါည်ပဲဖါ်ႈ ဘည်ပျံမ်းတိုအီးနီန်မာ် ဂေါည်ဂေါည်ပဲန်ခည်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
