မိုင်းရူပ၊ ဇန်နဝါရီ ၂၉ ရက်၊ ကျောက်မဲ
တအာင်းတပ်မတော်- PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့မှာ လေကြောင်း စိုးရိမ်ချက်ကြောင့် ဖုန်းလိုင်းနဲ့ အင်တာနက်လိုင်း ယာယီပိတ်ပင်ထားတယ်လို့ ရွှေဖီမြေက စုံစမ်းသိရှိရပါတယ်။
စစ်တပ်ဟာ ကျောက်မဲမြို့ပေါ် လေကြောင်းနဲ့ ဗုံးကြဲတိုက်ခိုက်ပြီးနောက် မနေ့ ဇန်နဝါရီ ၂၈ ရက်ကစပြီး PSLF/TNLA ရဲ့ ကျောက်မဲမြို့ အုပ်ချုပ်ရေးအဖွဲ့က စာထုတ်ပြီးတော့ ဖုန်းလိုင်းနဲ့ အင်တာနက်လိုင်း အသုံးပြုခွင့် ယာယီပိတ်ပင်ထားတာ ဖြစ်ပါတယ်။
“စတားလင့်ခ်က ပိတ်ထားတာ ဟုတ်တယ်။ CDMA ဖုန်းလိုင်းလည်း ပိတ်ထားတယ်။ သတင်းပေး ရှိနေလို့ပြောတယ်။ မနေ့ကစပြီးတော့ မိသားစုနဲ့ အဆက်အသွယ် မရတော့ဘူး” လို့ မန္တလေးမှာ စစ်ရှောင်နေတဲ့ ကျောက်မဲဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီရဲ့ သတင်းပေး ရှိနေတာကြောင့် ဖုန်းလိုင်းနဲ့ အင်တာနက်လိုင်းကို ပိတ်ပင်ထားတာဖြစ်တယ်လို့ ကျောက်မဲမြို့ရှိ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီ ၂၅ ရက်နဲ့ ၂၇ ရက်မှာ ကျောက်မဲမြို့ ပြည်သူ့ဆေးရုံနဲ့ ကျောက်မဲမြို့ ရပ်ကွက် ၂ မှာ လေကြောင်းနဲ့ ဗုံးကြဲတိုက်ခိုက်ခဲ့ရာ CDM ဆေးဝန်ထမ်းဆရာမတွေအပါအဝင် ၄ ဦး သေဆုံးပြီး ၂၀ ကျော် ထိခိုက်ဒဏ်ရာ ရခဲ့ပါတယ်။
ကျောက်မဲမြို့ဟာ ၁၀၂၇ စစ်ဆင်ရေးဒုတိယလှိုင်းအတွင်း PSLF/TNLA က တိုက်ခိုက်သိမ်းပိုက်ထားပြီး ၎င်းတို့ရဲ့ အုပ်ချုပ်ရေးယန္တရားကို အကောင်အထည်ဖော်နေတာ ဖြစ်ပါတယ်။
PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာလည်း လေကြောင်း စိုးရိမ်ချက်ကြောင့်ဆိုပြီး ပြီးခဲ့တဲ့ ၂၀၂၄ ခုနှစ် နိုဝင်ဘာလကစပြီး ဖုန်းလိုင်းနဲ့ အင်တာနက်လိုင်း ပိတ်ထားပါတယ်။
