ဆျှိုည်ဖီမျေ၊ ကျံရ်ဇူန် ဆငည်း 8၊ အေဲမ်ခြီရ်
ဘိူန်းအယ်နံပ်တောပ်စြာင်း ကာ်မ်မတီ လံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ်ကဲ မိုႈတဖုင်လံပ်လောတ်လာပ်ခါင် – KIO ကဲ ကဇောည်ဒဲႈရိူန်း ကနာည်လံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ်နီန် 550ဆဲန်အောႏ။
ကဲဒါႈ ခည်ကျံရ်ဇူန် ဆငည်း 6ဒိူန် ကာ်မ်မတီတီုင်ဒါင်း KIO ကဲ ကဇောည်ဟာဝ်းရိူန်း 500ဆဲန်ကာည်း ကာ်မ်မတီအင်မာဝ် အဆိုးယ KIO ကဲ ကဇောည် 50ဆဲန် ကစုကပိုမ် ကဲလှူဒေဲႈ 550ဆဲန်အောႏ။
ယိူဝ်ႇတမိုႈ ဂိုဒေါင်ယာမ်း တီုင်ဌာနလံပ်ဘြောင်ရိူန်းခြီရ် တံပ်တအာင်းကဲ ပဒူႈဟာဝ်း ခည်ကျံရ်မေ ဆငည်း 31ဒိူန် ခေဲင်ရဝ်ကော်င်တံပ် လှံင်အေဲမ်ခြီရ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်နာန်းတအာင်း – PSLF/TNLA ကဲ စီပဲန်တိုအီးခေဲင်အရာပ်ကဲ ယံမ်းဟာဝ်းပွံတ် 61အီးအောႏ။
တိုအီးခေဲင်အရာပ်ကဲ 150အီးမာ် ကတူႈဟာဝ်းဖါ်ႈဖေးဘာတ် ဂေါႇမိုႈဂါင်ဂေါည်ကဲ လူလှေဲဝ်ႏဟာဝ်း 680ကြောင် စီပဲန်ကဲလိုပ်ုန်ကဇောည် ဆနံမ်ဆပူည်ကာည်း ကနာည်လံပ်ႎီရ်ပျိူဝ်ႇယိူဝ်ႇကဲနီန်အောႏ။
ကနာည်လံပ်ႎီရ်ပျိူဝ်ႇယိူဝ်ႇနီန် တောပ်ပည် KIO/KIA ကဲ တံပ် “ဝ” – UWSA ကဲ ကဇောည်ဟာဝ်း 100ဆဲန်၊ တံပ်ဆီုက်ဆျှံမ် – SSPP ကဲ ကဇောည်ဟာဝ်း ရကာဝ် 20ကပျာဝ်းကာည်း ရိူန်း 100ဆဲန်၊ တအာင်း၊ ခါင်၊ ဆျှံမ်၊ ခယ်၊ ခိုလုံလီရှောကာည်း ဘြာန်ကဲ တောန်အရာပ်အရာပ်မာ် ကဇောည်လှူဟာဝ်းရိူန်းအောႏ။
ကဲပ္လိူရ်ႈအူန်းတစြာင်း ကာ်မ်မတီလံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ်ကဲ မိုႈတ ဇူႈကျံရ်ဇူန် ဆငည်း 4 ရောတ်ဘံင်ကျံရ်ဇူန် ဆငည်း 6ဒိူန် ကဲဟည်ဘိူန်းဟာဝ်းရိူန်း 4ဟြဲင်ဆဲန်လေႈ (425,385,200 ဘျာ) ကာည်း ရိူန်းခယ် 32,195 (180 ဘျာ) လေႈယာ့်အောႏ။
ကဝ်အီကပ္လါႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
