ရွှေဖီမြေ၊ ဇွန်လ ၂ ရက်၊ နမ့်ခမ်း
မေလ ၃၁ ရက် နေ့လယ် ၁၂ နာရီခွဲမှာ ရှမ်းမြောက် နမ့်ခမ်းမြို့နယ် ကောင်းတပ်ရွာက ပေါက်ကွဲမှုနဲ့ ပတ်သက်ပြီး တအာင်းတပ်မတော် TNLA အနေနဲ့ စုံစမ်းစစ်ဆေးမှုကို အမြန်ဆုံး လုပ်ဆောင်ဖို့ တအာင်းအရပ်ဘက်အဖွဲ့အစည်းကွန်ယက် TCSN က တောင်းဆိုလိုက်ပါတယ်။
ပေါက်ကွဲမှုကြောင့် ထိခိုက်သေဆုံးတဲ့ မိသားစုဝင်တွေနဲ့ နေအိမ်ပျက်စီးဆုံးရှုံးခဲ့ရတဲ့ ဒေသခံတွေအတွက် နစ်နာကြေး၊ ပြည်လည်ထူထောင်ရေး၊ လူမှုဘဝ ပြန်လည်တည်ဆောက်နိုင်ဖို့ အမြန်ဆုံးဆောင်ရွက်ပေးဖို့လည်း TCSN ရဲ့ မနေ့ ဇွန်လ ၁ ရက် ထုတ်ပြန်ချက်မှာ ပါရှိပါတယ်။
ဒီနေ့ ဇွန်လ ၂ ရက်အထိ စာရင်းအရ သေဆုံးသူ ၆၀ ဦးအထိ ရှိလာပြီး ဒဏ်ရာရရှိသူ ၁၀၀ ကျော်ရှိတယ်လို့ ကယ်ဆယ်ရေး လုပ်နေသူတစ်ဦးက ရွှေဖီမြေသို့ ပြောပါတယ်။
“မနေ့အထိတော့ ၅၆ ယောက် သေဆုံးတာ။ ဒီနေ့မှ ထပ်တိုးလာတာပေါ့။ ဆေးရုံမှာလည်း ၂ ယောက် စိုးရိမ်ရတဲ့ အခြေအနေရှိနေပါတယ်။ ပိတ်မိနေသူလည်း ရှိသေးတယ်။ မိသားစုဝင်တွေက လူတွေ ပျောက်နေသေးကြောင်းတွေ ပြောတယ်” လို့ ဆိုပါတယ်။
တအာင်းတပ်မတော် TNLA ကတော့ ဒီယမ်းဂိုဒေါင် ပေါက်ကွဲမှု ဖြစ်စဉ်အတွင်း သေဆုံးသူ ၄၃ ဦး ရှိတယ်လို့ ထုတ်ပြန်ထားပြီး ထိခိုက်ဒဏ်ရာရရှိသူ ၁၁၂ ဦး၊ အဲထဲမှာမှ ပြင်းထန်ဒဏ်ရာရရှိသူ ၃၇ ဦးရှိတယ်လို့ မနေ့ ဇွန်လ ၁ ရက်မှာ သတင်းထုတ်ပြန်ထားပါတယ်။
ထိခိုက်ခံစားနေရတဲ့ ဒေသခံတွေနဲ့အတူ လိုအပ်တဲ့ လူသားချင်း စာနာထောက်ထားမှု အထောက်အပံ့တွေ ရရှိစေဖို့ ဖော်ဆောင်ရေးလုပ်ငန်းတွေကို အတူတကွ လုပ်ဆောင်သွားမယ်လို့ တအားအရပ်ဘက်အဖွဲ့အစည်းကွန်ယက်က ဆိုထားပြီး တအာင်းပြည်ကောင်စီ TLC ကလည်း ယမ်းပေါက်ကွဲမှုမှာ ပါဝင်ပတ်သက်သူတွေကို အရေးယူပေးဖို့နဲ့ ထိခိုက်သူတွေကို ဝိုင်းဝန်းကူညီပေးကြဖို့ တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
