ရွှေဖီမြေ၊ မေလ ၂၉ ရက်၊ မင်းကင်း
စစ်ကိုင်းတိုင်း မင်းကင်းမြို့မှာ အခြေစိုက်တဲ့ ဒေသကာကွယ်ရေးတပ်ဖြစ်တဲ့ ကျောင်းသား တော်လှန်ရေးတပ်တော်- SRF နဲ့ အမျိုးသား ညီညွတ်ရေးအစိုးရ- NUG ရဲ့ လက်အောက်ခံတပ်အကြား ဖြစ်ပွားနေတဲ့ စစ်ရေး တင်းမာမှု ပြေလည်သွားပြီလို့ နှစ်ဖက်တပ်က ပူးတွဲကြေညာချက် ထုတ်ပြန်လာပါတယ်။
နှစ်ဖက်ဆွေးနွေးဆောင်ရွက်မှုရဲ့ သဘောတူညီချက်အရ NUG ရဲ့ မင်းကင်း ပကဖဘက်က ဖမ်းဆီးထားတဲ့ ရဲဘော်တွေထဲက ပြစ်မှုမရှိတဲ့သူတွေကို လွှတ်ပေးဖို့၊ တိုင်ကြားခံရတဲ့ ရဲဘော်တွေကို NUG ရဲ့ ဥပဒေနဲ့အညီ အရေးယူဖို့ ပါဝင်ပါတယ်။
ဒါ့အပြင် ပြစ်မှုကျူးလွန်ခြင်း မရှိတဲ့ SRF ရဲ့ ရဲဘော်တွေကို NUG ရဲ့ ကွပ်ကဲမှုအောက် ဝင်ရောက်ရမှာဖြစ်ပြီး တော်လှန်ရေးကို ဆက်လက်ပူးပေါင်းသွားမယ်လို့ သဘောတူထားပါတယ်။
ပြီးခဲ့တဲ့ မေလ ၂၆ ရက်မှာ ပြစ်မှုကျူးလွန်ထားတယ်ဆိုပြီး SRF ရဲ့ဥက္ကဋ္ဌ ကိုစံတင်ထွန်းနဲ့ ရဲဘော် ၁၆ ဦးကို NUG ရဲ့ လက်အောက်ခံတပ်တွေက ဖမ်းဆီးသွားရာကနေ နှစ်ဖက်တပ်အကြား စစ်ရေး တင်းမာမှု ဖြစ်ပွားခဲ့တာပဲ ဖြစ်ပါတယ်။
NUG ရဲ့ မင်းကင်းမြို့နယ် ပကဖကတော့ SRF တပ်ဖွဲ့က လူသတ်မှုအပါအဝင် အမှု ၈ မှု ကျူးလွန်ထားပြီး NUG အုပ်ချုပ်ရေးကို ဝင်ရောက်စွက်ဖက်ကာ စင်ပြိုင်အုပ်ချုပ်ရေး ဖော်ဆောင်နေတဲ့အတွက် အရေးယူသွားမယ်လို့ မေလ ၂၄ ရက်က ထုတ်ပြန်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
