ပိုႈလဘား၊ ကျံရ်မေ ဆငည်း 18၊ မူစယ်
တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈဒါႈ ဒီဘိူန်းကဲတထိင်ခြဲ ဒီကစာပ်ကအူရ်ကုင်ခယ် – ကုင်ကပိုမ်ဘြာန် ပကပီုန်ဆျှံမ်ကဒါႇပိူည် ခေဲင်ကီုင်းမူစယ်နီန် ဘိူန်းဒေတိုည်းဟာဝ်း တိုအီးအီရေဲန်ဇီုင်းကာန်ကျားဖြန်နီန် 38 အောႏ။
အမှိူဝ် ကျံရ်မေ ဆငည်း 17 ဒိူန် တံပ်ကညာအာဏာဆီုက်ဇေဝ်ကဲ လီပ်ယာ်ႈဟာဝ်းဖါ်ႈ ယုင်ကျားဖြန်အ်ုန်အီဂေါည် ခေဲင်ဇံင်စွမ်စော် ပကီုင်းမူဆယ်နီန် ဘိူန်းဒေတိုည်းဟာဝ်း ကောန်ခယ် 4 အီး ကောန်ဘြာန်း 38 အီးအောႏ။
တိုအီးအရာပ်ဒီန် ကောန်အီပ်ုန်အူအီး က္လာင်းဒါႈ “ မိုႈအေ့ကဲတိုည်း။ ကဲချာင်ရဲန်လိူည် ဆာ်ကဲဟောည်ႇတိုည်း ကဲႎီရ်ပ္လေႈလေႈဘိုး။ ကဲအာဝ်ဘယ်စိဒေတိုည်း အ်ုန်အီမိုႈကဝ်အီအွံရ်ဒိူန်။ ကဲတိုည်းလိူည် ဂြိုခြီုင်ပ်ုန်ဒါကဲ ကာည်း တိုအီးခြူမ်ကဲဒီန်။ ဆာ်ဟောည်ႇမာ် ကဲဂီုည်ပ္လေႈလေႈလိူည်။ ကဲဒဲႈဖါ်ႈဒေဒါဆဒါင်ရအာည်ႇ စီဒေဲႈတိုည်းဟာဝ်း ခိင်ဒီန်အီအွံရ်ကဲဒိူန်မာ် ဟည်ဒဝ်”။
တောပ်ခေဲင်ပ်ုန်ပ္လိူရ်ႈလေႈကဲ ဆဲႈဒါႇဒီန် ကဲဘိူန်းဒေဆီမ်းဟာဝ်း ပ်ုန်ဒါကျားဖြန်ကဲ ႎှါင်းဒါင်း၊ ႎှုင် 155 ပိုင်း၊ ကွန်ပျူတာ 30 ပိုင်း၊ ရိူန်းခယ် 1 မှီူန်( ရိူန်းဘြာန် 60 ဆဲန်)၊ ရိူန်းဘြာန်နီန် 10 ဆဲန်ကာည်း ကား 2 ကြောင်အောႏ။
ခည်ကျံရ်အေပ်ြုရ် ဆငည်း 29 ဒိူန်မာ် တံပ်ကညာအာဏာဆီုက်ဇေဝ်ကဲ လီပ်ယာ်ႈဟာဝ်းဖါ်ႈ ယုင်ကျားဖြန် အ်ုန်အီဂေါည်ခေဲင်ဇံင်တော်ရွက် ပလှံင်မူစယ်နီန် ဘိူန်းဒေတိုည်းဟာဝ်း တောပ်ပည် ႎှါင်းဒါင်းနီန် စာက်ကာည်း စတားလင့် ဆဲႈဒါႇဒီန်ဘိူန်းဒေတိုည်းဟာဝ်း ကောန်ခယ် 2 အီး ကောန်ဘြာန်း 12 အောႏ။
ဆဲႈဒါႇဒီန် ခည်ကျံရ်အေပ်ြုရ် ဆငည်း 29 စူန်အံပ် 4 နြီလေႈအိုည်ကိူရ်မနေတ် ဒိူန်မာ် ပကီုင်းမူစယ် ခေဲင်ဇံင်ဟိုမွန်နီန် ဘိူန်းဘိုးဒေတိုည်းဟာဝ်း ကောန်ခယ် အီလီပ်ဒေဲႈတောပ်ဒေင်အာဝ်တြားနီန် 26 အီးအောႏ။
ဘိူည်မိူဝ်ႈဘာည်းတိုည်းကဲနီန် ကဇေန်နီးမာ် ပမူစယ်နီန် ယုင်ကျားဖြန်ကဲ ဂီုည်ထာမ်းဖါ်ႈဒေရူရ်ႈတ ဌာနအီကဆီုဝ်ကဆဲင်ကဲ ဂီုည်ဆီုပ်ႎိူဝ်ႈဟာဝ်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
