ရွှေဖီမြေ၊ မေလ ၁၃ ရက်၊ ဘီလင်း
ကရင်အမျိုးသားအစည်းအရုံး(KNU) ကော်သူးလေအုပ်ချုပ်နယ်မြေ ဘီးလင်းမြို့နယ်မှာ စစ်ရှောင်တွေ လိုက်ပါလာတဲ့ကားကို စစ်ကောင်စီတပ်က ပစ်ခတ်ခဲ့တာကြောင့် သားအမိ၂ ဦးသေဆုံးပြီး ၂ ဦး ဒဏ်ရာရခဲ့တယ်လို့ KNU က ဒီနေ့ မေလ ၁၃ ရက်မှာ ထုတ်ပြန်ထားပါတယ်။
ပြီးခဲ့တဲ့ မေလ ၉ ရက် နေ့လယ် ၂ နာရီဝန်းကျင်မှာ လေးကေကျေးရွာက ယာဉ်မောင်းတစ်ဦးနဲ့ စစ်ဘေးရှောင် ၇ ဦး လိုက်ပါစီးနင်းလာတဲ့ကားကို စစ်တပ် စစ်ကူစစ်ကြောင်းက လေးကေတောင်ဂူဝဘုရားလေးလမ်းမှာ ရပ်တန့်ခိုင်းပြီးနောက် သေနတ်နဲ့ ပစ်ခတ်ခဲ့တာလို့ ဆိုပါတယ်။
အဆိုပါ ပစ်ခတ်မှုကြောင့် လေးကေကျေးရွာက အသက် ၆၄ နှစ်အရွယ် နော်ဖိုးပီနား (ခ) နော်ဖောအဲ့ နဲ့ သမီးဖြစ်သူ အသက် ၁၃ နှစ်အရွယ် နော်ပန်းအိဖြူ တို့ သေနတ်ထိမှန် သေဆုံးခဲ့ပြီး အသက် ၁၅ နှစ်ကလေး ၁ ဦးနဲ့ အရပ်သား ၁ ဦး သေနတ်ထိမှန် ဒဏ်ရာရခဲ့တာကြောင့် ကုသမှု ခံယူနေတယ်လို့ ထုတ်ပြန်ထားပါတယ်။
ဒါ့အပြင် ကားပေါ်လိုက်ပါလာတဲ့ ဒေသခံ ၄ ဦးကိုလည်း စစ်ကောင်စီတပ်သားတွေက ဖမ်းဆီးခေါ်ဆောင်သွားခဲ့ပြီး မေလ ၁၀ ရက်မှာ ယာဉ်မောင်းနဲ့အရပ်သား ၂ ဦးကို ပြန်လွှတ်ပေးခဲ့တယ်လို့ သိရပါတယ်။
အလားတူ ပြီးခဲ့တဲ့ မေလ ၇ ရက်ကလည်း စစ်တပ်ဟာ လယ်ဒိုမြို့နယ် သံဆိပ်ကနေ လက်ကောက်ဝရွာထဲ ၈၁ မမ လက်နက်ကြီး ၂ လုံး ပစ်ခတ်တိုက်ခိုက်ခဲ့တာကြောင့် အသက် ၁၇ နှစ်အရွယ် နော်ရင်ကြည်၊ ၂၅ နှစ်အရွယ် နော်စိုးမိုးနဲ့ အသက် ၄၂ နှစ်အရွယ် စောမောင်လှတို့ ထိခိုက်ဒဏ်ရာရခဲ့တယ်လို့ KNU က ပြီးခဲ့တဲ့ မေလ ၁၁ ရက်မှာ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
