ပို့လဘား၊ ဧပြီ ၂၉ ရက်၊ တန့်ယန်း
ရှမ်းမြောက် တန့်ယန်းမြို့ ရပ်ကွက် ၃ မှာ ဒီနေ့ ဧပြီ ၂၉ ရက် မနက် ၆ နာရီခွဲမှာ ယာဉ်တိုက်မှုဖြစ်လို့ အမျိုးသမီးတစ်ဦးသေဆုံးခဲ့တယ်လို့ ဖြစ်စဉ်သိရှိသူအမျိုးသားတစ်ဦးပြောပြချက်အရ သိရပါတယ်။
“တိုက်ခံရတဲ့သူတွေက နေ့တိုင်းလမ်းထလျှောက်တဲ့ အဖွဲ့တွေ။ သူတို့ လမ်းလျှောက်ပြီး ပြန်လာတဲ့အချိန်မှာပဲ ဖြစ်သွားတာ။ တိုက်တဲ့ကားက ဘုန်းကြီးမောင်းတဲ့ကားဖြစ်နေတယ်။ ဘုန်းကြီးတွေကလည်း ဆွမ်းစားကြွလာတာလား အာရုံဆွမ်းကပ်ကနေ ပြန်လာတာလားမသိဘူး။ ကားအရှိန်မထိန်းနိုင်လို့ ဝင်တိုက်တာလား မပြောတတ်ဘူး။ ကားကတော့ အရှိန်တော်တော်ပြင်းတာပဲ။ တစ်လမ်းလုံး သူတစ်စီးပဲရှိတာ”
ကားတိုက်ခံရလို့ သေဆုံးသွားတဲ့ အမျိုးသမီးတစ်ဦးဟာ အသက် ၆၀ ကျော်ရှိပြီး ၎င်းကို တိုက်သွားတဲ့ ဘုန်းကြီးကိုတော့ တာဝန်ရှိသူ ရဲတပ်ဖွဲ့တွေက ဖမ်းဆီးထားပြီး ဘယ်လိုအရေးယူဆောင်ရွက်သွားမယ်ဆိုတာကိုတော့ မသိရသေးဘူးလို့ ဆိုပါတယ်။
“ဘုန်းကြီးကိုတော့ ရဲစခန်းခေါ်သွားတယ်။ အမှုတွေကျတော့ တိုက်ခံရတဲ့ ဘွားတော်ရဲ့သား ပြန်လာတဲ့အချိန်ကျမှ အမှုက ကျေအေးမကျေအေး သိမှာတဲ့။ အဲလိုတော့ ကြားရတယ်။ အခုလောလောဆယ်တော့ တိုက်ခံရတဲ့သူရဲ့နားရေးသုံးဖို့ သိန်း ၃၀၀ လာပေးသွားတယ်”
တန့်ယန်းမြို့မှာ ယာဉ်တိုက်မှုတွေ မကြာခဏခဏဖြစ်ပွားနေပေမယ့် သက်ဆိုင်ရာတွေက တရားခံတွေကို ဖမ်းဆီးမိတာမရှိသလို ဖမ်းမိရင်လည်း ပြန်လွှတ်ပေးနေတာတွေ ရှိနေတယ်လို့ ဒေသခံတွေရဲ့ ပြောပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
