ရွှေဖီမြေ၊ ဧပြီ ၂၇ ရက်
ပအိုဝ်းအမျိုးသားလွတ်မြောက်ရေးတပ်မတော် – PNLO/PNLA တပ်ဖွဲ့ဝင် ၆၁ ဦးက လက်နက်ချ အလင်းဝင်လာကြောင်း စစ်ကောင်စီတပ်ဘက်က မနေ့ ဧပြီ ၂၆ ရက်မှာ သတင်းထုတ်ပြန်ထားပါတယ်။
အလင်းဝင်လာတဲ့ PNLA တပ်ဖွဲ့ဝင်တွေကို စစ်ကောင်စီရဲ့ အရှေ့ပိုင်းတိုင်း စစ်ဌာနချုပ်မှာ ကြိုဆိုတဲ့ အခမ်းအနား ပြုလုပ်ခဲ့ပြီး လက်နက်ခဲယမ်းတချို့လည်း ပါလာကြောင်း စစ်ကောင်စီရဲ့ ထုတ်ပြန်ချက်ထဲမှာ ဖော်ပြထားပါတယ်။
PNLO ရဲ့ ပြောရေးဆိုခွင့်ရှိသူ ကိုခွန်ရိန်းယံကတော့ မြေပြင်မှာ စစ်ကောင်စီနဲ့ ပူးပေါင်းသွားတဲ့ PNLA တပ်ဖွဲ့ဝင် ၃၀ ရှိပြီး ခွန်တန်ဆိုသူ ဦးဆောင်တဲ့ တပ်ဖွဲ့ဝင်တွေဖြစ်တယ်လို့ ရွှေဖီမြေကို ပြောပါတယ်။
“တော်လှန်ရေးရဲ့ အခက်အခဲကို ရင်မဆိုင်နိုင်တာ တစ်ကြောင်း၊ တော်လှန်ရေး စိတ်ဓာတ် ခိုင်မာမှုမရှိတာရယ်ပေါ့။ အဲတာကြောင့်ပဲ လက်နက်ချသွားတယ်” လို့ ဆိုပါတယ်။
PNLO/PNLA မှာ စစ်ကောင်စီကို တိုက်ခိုက်မယ်ဆိုတဲ့ အဖွဲ့နဲ့ တနိုင်ငံလုံး အပစ်အခတ်ရပ်စဲရေး သဘောတူစာချုပ် – NCA အတိုင်း စစ်တပ်နဲ့ ဆွေးနွေးမယ်ဆိုတဲ့ ဗိုလ်မှူးကြီး ခွန်ဥက္ကာဦးဆောင်တဲ့ အဖွဲ့ဆိုပြီး နှစ်ဖွဲ့ ကွဲနေပါတယ်။
စစ်ကောင်စီတပ်ဟာ တော်လှန်ရေးတပ်ဖွဲ့တွေကို လက်နက်ချ အလင်းဝင်ဖို့ မကြာခဏ စည်းရုံးတာတွေ ပြုလုပ်နေပြီး စစ်ခေါင်းဆောင်ဟောင်းလည်းဖြစ် လက်ရှိသမ္မတလည်း ဖြစ်တဲ့ ဦးမင်းအောင်လှိုင်ကလည်း ရက် (၁၀၀) အတွင်း PDF တွေအနေနဲ့ လက်နက်ချ အလင်းဝင်ဖို့ ပြောဆိုထားပါတယ်။
ဧပြီ ၂၄ ရက်မှာလည်း တအာင်းတပ် – TNLA၊ အာရက္ခတပ်တော် – AA အပါအဝင် ပြည်သူ့ကာကွယ်ရေးတပ် – PDF တပ်ဖွဲ့ဝင် ၅၀၀ ကျော် အလင်းဝင်လာတယ်လို့ စစ်ကောင်စီက ဝါဒဖြန့် ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
