ရဲမာန်၊ ဧပြီ ၂၂ ရက်၊ ရွှေဘို
စစ်ကိုင်းတိုင်း ရွှေဘိုမြို့နယ် အနောက်ခြမ်းက ကျေးရွာ ၁ ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၁ ဦးသေဆုံးခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီ ၂၂ ရက် ည ၁၁ ခွဲဝန်းကျင်မှာ ဂျက်ဖိုက်တာ ၃ စီးနဲ့ ဗုံး ၅ လုံးကြဲချတိုက်ခိုက်ခဲ့ပြီး အရပ်သား ၃ ဦးလည်း ထိခိုက်ဒဏ်ရာရရှိခဲ့တယ်လို့ ၎င်းက ပြောပါတယ်။
“အမျိုးသမီး ၁ ဦးက မီးထဲပါသွားတယ်။ ထိခိုက်ဒဏ်ရာရတာက အမျိုးသား ၃ ဦးပါ။ မြို့ရဲ့ တောင်ဘက်နဲ့ အနောက်ဘက် အထွက်တွေမှာလည်း စစ်ကောင်စီတပ်က အင်အားတွေစုဖွဲ့ထားလို့ အချိန်မရွေးစစ်ကြောင်းထိုးလာမှာကို ဒေသခံတွေက စိတ်ပူနေတယ်”
အဆိုပါ ဗုံးကြဲတိုက်ခိုက်မှုကြောင့် အရပ်သား နေအိမ်တွေ မီးလောင်ပျက်စီးခဲ့တဲ့အပြင် နွားနဲ့ ဆိတ်တွေလည်း သေဆုံးခဲ့ရတယ်လို့ ၎င်းကပြောပါတယ်။
အခုရက်ပိုင်းတွေမှာ စစ်ကောင်စီတပ်က ရွှေဘိုအနောက်ခြမ်းရှိ ကျေးရွာတွေကို ဂျက်ဖိုက်တာ၊ ဒရုန်း၊ လက်နက်ကြီးတွေ အသုံးပြုပြီး ခပ်စိတ်စိတ်ပစ်ခတ်မှုတွေ ပြုလုပ်နေတယ်လို့ ၎င်းက ပြောပါတယ်။
အလားတူ မနေ့ ဧပြီလ ၂၁ ရက် နေ့လယ် ၃ နာရီဝန်းကျင်မှာ စစ်ကောင်စီတပ်က တန့်ဆည်မြို့နယ် ကံထူးမရွာကို လေကြောင်းကနေ ဗုံးကြဲတိုက်ခိုက်ခဲ့လို့ တော်လှန်ရေးတပ်သား ၅ ဦးအပါ ၆ ဦးထိခိုက်ဒဏ်ရာရရှိခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
