ရွှေဖီမြေ၊ ဧပြီ ၁၁ ရက်
မနေ့ ဧပြီ ၁၀ ရက်မှာ ကျရောက်တဲ့ အာရက္ခတပ်တော်- AA ရဲ့ ၁၇ နှစ်ပြည့် တပ်မွေးနေ့အတွက် ပေးပို့လိုက်တဲ့ သဝဏ်လွှာမှာ ဗိုလ်ချုပ် ထွန်းမြတ်နိုင်က ၂၀၂၆ ခုနှစ်နဲ့ ၂၀၂၇ ခုနှစ်မကုန်ခင် လက်စသိမ်းအောင်ပွဲခံဖို့ လုံးဝ ယုံကြည်ချက်နဲ့အညီ တိုက်ပွဲဝင်ကြဖို့ တပ်သားတွေကို ပြောဆိုထားပါတယ်။
ခြွင်းချက်အနေနဲ့ အဲဒီကာလရောက်လို့ မပြီးနိုင်သေးရင်လည်း အဆုံးထိ တိုက်ပွဲ ဝင်သွားကြဖို့လည်း ပြောဆိုထားပါတယ်။
“ငါတို့၏ ပေးဆပ်ထားမှုများ တစ်ခုမျှ အလဟဿ မဖြစ်စေရ။ နိုင်ကို နိုင်ရမည်၊ အောင်ကို အောင်ရမည်ဟူသော ယုံကြည်ချက်၊ သန္နိဋ္ဌာန်တို့နှင့်အတူ ငါတို့ ဆက်လက်ပြီး အပြတ်သားဆုံး တိုက်ပွဲဝင်ကြရန် ၁၇ နှစ်မြောက် တပ်တော်နေ့မှာ လမ်းညွှန်မှာကြားလိုက်သည်” လို့ ဗိုလ်ချုပ် ထွန်းမြတ်နိုင်က ပြောဆိုထားပါတယ်။
အာရက္ခတပ်တော်နဲ့ အာရက္ခပြည်သူတွေရဲ့ ၁၇ နှစ်တာ တိုက်ပွဲဝင် ရုန်းကန်ကြိုးစားမှုကြောင့် အာရက္ခနယ်မြေအများစုကို အတိုင်းအတာတစ်ခုအထိ ထိန်းချုပ်နိုင်လာပြီဖြစ်ကြောင်းနဲ့ ဘဝတူ အဖိနှိပ်ခံတော်လှန်ရေး မိတ်ဖက်အင်အားစုတို့ကို စာနာနားလည်မှု မှန်ကန်သော စေတနာနဲ့ တတ်နိုင်သမျှ လက်တွဲဖေးမကူညီကာ ဘုံရန်သူကို အတူတူလက်တွဲ တိုက်ပွဲဝင်ကြရန်၊ မဟာမိတ်ကို အလေးအနက် တန်ဖိုးထားကာ အပြန်အလှန်ကူညီပြီး ဆက်လက် တိုက်ပွဲ ဝင်သွားကြရန်၊ အပြန်အလှန် စာနာနားလည်မှု၊ လေးစားတန်ဖိုးထားမှု၊ စည်းလုံးညီညွတ်မှု၊ လက်တွေ့ကျတဲ့ တိုက်ပွဲတွေနဲ့အတူ လက်တွဲတိုက်ပွဲဝင်ကြဖို့လည်း သူက ပြောဆိုထားပါတယ်။
AA ဟာ ရခိုင်ပြည်နယ်ထဲက ပုဏ္ဏားကျွန်း၊ မြောက်ဦး၊ ပေါက်တော၊ မင်းပြား၊ မောင်တော၊ ဘူးသီးတောင်၊ ရသေ့တောင်၊ တောင်ကုတ်၊ အမ်း၊ ဂွ၊ ငပလီ၊ သံတွဲ၊ ကျောက်တော်၊ ရမ်းဗြဲနဲ့ ချင်းပြည်က ပလက်ဝမြို့တွေကို သိမ်းပိုက်ထားပြီး စစ်တွေ၊ ကျောက်ဖြူ၊ မာန်အောင်မြို့နယ် ၃ ခုသာ သိမ်းပိုက်ဖို့ ကျန်ရှိတော့တာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
