ပို့လဘား၊ ဧပြီလ ၇ ရက်၊ နောင်ချို
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် နောင်ချိုမြို့နယ်မှာ မိုင်းကို ပေါက်မိရာကနေ ပေါက်ကွဲလို့ အမျိုးသားတစ်ဦး သေဆုံးပြီး အမျိုးသမီးတစ်ဦး ထိခိုက်ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ပြောပါတယ်။
နောင်ချိုမြို့နယ် ညောင်တောကျေးရွာအုပ်စု ယာပြင်ကျေးရွာနေ အသက် ၆၅ နှစ်အရွယ်ရှိတဲ့ အမျိုးသားတစ်ဦးနဲ့ အသက် ၇၈ နှစ်အရွယ်ရှိတဲ့ အမျိုးသမီးတစ်ဦးတို့ဟာ ပြီးခဲ့တဲ့ မတ်လ ၂၉ ရက်က ၎င်းတို့အိမ်ခြံအတွင်း သန့်ရှင်းရေးလုပ်ရာကနေ မိုင်းပေါက်မိပြီး ပေါက်ကွဲခဲ့တာဖြစ်ပါတယ်။
ဒေသခံအမျိုးသားက “အိမ်နားမှာ သန့်ရှင်းရေးလုပ်ရင်းနဲ့ ပေါက်ပြားနဲ့ မိုင်းကို ပေါက်မိသွားတာ။ သူ့သားက အဆုတ်နားမှာ ထိသွားတော့ ဆေးရုံမရောက်ခင် လမ်းတစ်ဝက်မှာပဲ ဆုံးသွားတာ။ သူ့အမေကျတော့ ညာဘက်လက်နဲ့ ခြေထောက်တွေမှာ ထိသွားတာ” လို့ ပြောပါတယ်။
အဆိုပါမိုင်း ပေါက်ကွဲမှုကြောင့် ထိခိုက်ဒဏ်ရာရရှိသွားတဲ့ အမျိုးသမီးကတော့ နောင်ချိုမြို့ရှိ ပြည်သူ့ဆေးရုံမှာ ဆေးကုသမှု ခံယူနေရတယ်လို့ ဆိုပါတယ်။
ပြီးခဲ့တဲ့ မတ်လ ၂၈ ရက်မှာလည်း နောင်ချိုမြို့နယ် မတ်လွတ်ကျေးရွာက အသက် ၃၉ နှစ်အရွယ်ရှိတဲ့ ဒေါ်သီတာမွေးဆိုသူကလည်း ၎င်းရဲ့နေအိမ်အရှေ့ဘက်ရှိ လမ်းမကြီးဘေးမှာ လမ်းသန့်ရှင်းရေးလုပ်နေရင်း မိုင်းခုတ်မိရာကနေ ပေါက်ကွဲခဲ့ပြီး ထိခိုက်ဒဏ်ရာရရှိခဲ့ပါသေးတယ်။
တိုက်ပွဲပြင်းထန်စွာဖြစ်ပွားခဲ့တဲ့ နေရာတွေဟာ ရှမ်းမြောက်က နောင်ချိုမြို့နယ်မှာလည်း တစ်မြို့အပါအဝင်ဖြစ်တာကြောင့် အခုလို မြေမြှုပ်မိုင်း နင်းမိတာတွေလည်း မကြာခဏဖြစ်ပွားပြီး အထူးဂရုစိုက်ဖို့ လိုအပ်ကြောင်း ပြောဆိုကြပါတယ်။
ရွှေဖီမြေက ပြုစုထားတဲ့ စာရင်းအရ ရှမ်းမြောက်မှာ ပြီးခဲ့တဲ့ ၂၀၂၅ ခုနှစ် တစ်နှစ်အတွင်း မြေမြှုပ်မိုင်းကြောင့် ကလေး ၂ ဦးအပါအဝင် ၉ ဦး သေဆုံးခဲ့ပြီး ကလေး ၆ ဦးအပါအဝင် ၂၇ ဦး ဒဏ်ရာ ရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
