ရွှေဖီမြေ၊ ဧပြီ ၂ ရက်
တအာင်းတပ်မတော်- PSLF/TNLA ရဲ့ဌာနတစ်ခုဖြစ်တဲ့ အမျိုးသမီး ဖွံ့ဖြိုးရေးဌာန- WDD က ထိန်းချုပ်ဒေသထဲမှာရှိတဲ့ ကျေးရွာပေါင်း ၃၄ ရွာက ဒေသခံ ၁ ထောင်ကျော် (၁,၁၈၉ ဦး)ကို အသိပညာပေးလုပ်ငန်းတွေ ဆောင်ရွက်ပေးခဲ့တယ်လို့ ၎င်းတို့ရဲ့ ထုတ်ပြန်ချက်အရ သိရပါတယ်။
အဲဒီကျေးရွာ ၃၄ ရွာဟာ နမ့်ခမ်း၊ မိုင်းငေါ့၊ သီပေါ၊ နမ့်ဆန်၊ မန်တုံ၊ နမ္မတူနဲ့ ကျောက်မဲ မြို့နယ်တွေထဲက ကျေးရွာတွေဖြစ်ပြီး အဓိက အမျိုးသမီးနဲ့ ပျော်ရွှင်တဲ့ မိသားစု တည်ဆောက်ရေး၊ လိင်ပိုင်းဆိုင်ရာ အသိပညာပေး၊ အမျိုးသမီးနဲ့ မူးယစ်ဆေးဝါး၊ အမျိုးသမီးနဲ့ ပညာရေး၊ မိသားစု စီမံကိန်း၊ စောစောစီးစီး အိမ်ထောင်ကျခြင်း၊ အမျိုးသမီးနဲ့ ကျန်းမာရေး၊ ကျားဖြန့်ဆိုင်ရာ အကြောင်းအရာတွေကို အသိပညာပေး ဆောင်ရွက်ခဲ့တယ်လို့ ဆိုပါတယ်။
PSLF/TNLA ရဲ့ အမျိုးသမီးဌာနဟာ ဒေသတွင်းထဲမှာရှိတဲ့ အမျိုးသမီးတွေရဲ့ အခြေခံ လူ့အခွင့်အရေး ကာကွယ်မြှင့်တင်ရေးကို အဓိကထားပြီး အမျိုးသမီးတွေအပေါ် အကြမ်းဖက်မှု လျော့ကျရေး၊ အမျိုးသမီး စွမ်းရည်မြှင့်တင်ရေး၊ လူထုအသိပညာပေး စည်းရုံးရေး၊ အသက်မွေးဝမ်းကြောင်းနဲ့ ဝင်ငွေ လည်ပတ်စီးဆင်းမှု တိုးတက်ရေး စတဲ့အစီအစဉ်နဲ့ လုပ်ငန်းစဉ်တွေ ဆက်လက်ဆောင်ရွက်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဖေဖော်ဝါရီလအတွင်းမှာလည်း ကွတ်ခိုင်မြို့နယ်ထဲက ကျေးရွာ ၅၄ ရွာအပါအဝင် တအာင်းဒေသထဲရှိ ကျေးရွာပေါင်း ၉၈ ရွာက ဒေသခံ ၅ ထောင်ကျော်ကို အခုလို ကွင်းဆင်းအသိပညာပေးလုပ်ငန်းတွေ လုပ်ဆောင်ခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
