မာည်းပါင်ပျော၊ ကျံရ်မာချှ် ဆငည်း 25၊ လာဆေဝ်
ဘိူန်းအယ်တခေါရ်နံပ်တ တိုအီးခေဲင်အရာပ်ကဲဒါႈ ဂေါႇမိုႈအိုမ်ပျြံင်ထာတ် ပကီုင်းလာဆေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် စီပဲန်ကား ဆဲင်ကယ်ကဲ ဘ်ုပ်ဇံင်းအူန်းဖါ်ႈ ကနာည်နံင်ဘိူန်းဇိူရ်ႈ အိုမ်ပျြံင်ထာတ်နီန်အောႏ။
ကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းတဆျှိုည်ဖီမျေဒါႈ ဘံင်ခိင်ညှာ ကျံရ်မာချှ် ဆငည်း 25နီန် အီဒေဲႈကနာည်နံင်ဟံပ် အိုမ်ပျြံင်ထာတ် ပဆဴင်ကဲအီယံင်းအိုမ်ပျြံင်ထာတ်ကဲနီန် ဂီုန်းဖါ်ႈ ဘ်ုပ်ဇံင်းကယည်အူန်း ရအာည်ႇအောႏ။
“အောယိူဝ်ႇတိူရ်ႈခိင်ညှာနီန် ကားဆဲင်ကယ် အီဇံင်းကတျံရ်အူန်း ကဒါႇလာဆေဝ်ဒါင်း အထက (3)နီန် နံင်မိုႈပွံတ် ကပံတ်အူမဲင်ႏ။ ဒီဟံရ်မာ် ဘာည်းအူန်းဒီန်။ ဆာ်ဆဴင်အိုမ်ပျြံင်ထာတ်ကဲ ႎိူဝ်ႈခိင်ညှာ 1နြီ ဘ်ုပ်ဇံင်းရဲ့ပွံတ် ဆီုင်ခီမှိူဝ်”
တောပ်ပ်ုန်က္လာင်း တိုအီးခေဲင်အရာပ်ကဲ မံင်ခ္လ ကဲဒါႈတိုအီးကဲမံင်ခ္လ ဘ်ုပ်ဟာဝ်းဇံင်းကတျံရ်ဖါ်ႈ ကနာည်နံင်ဘိူန်းအိုမ်ပျြံင်ထာတ်ဒီန် ဆီုင်ခီမှိူဝ် ကားဆဲင်ကယ် အီဇံင်းကတျံရ်ရီမ်းပြော ဆဴင်အိုမ်ပျြံင်ထာတ်ကဲဒီန်မာ် ကယည်ဒိုင်းခည်းအောႏ။
တိုအီးခေဲင်အရာပ်ကဲ က္လာင်းဒါႈ ဆဲႈဒါႇဒီန် ဆာ်မိုႈကဒါႇနှာရိူဝ်ႇကီုင်းလာဆေဝ် ဒီပ်ုန်ထိင်ခြဲအူန်း တံပ်ကိုးကာင်း – MNDAA ကဲနီန် အာဝ်လိုစိဇံင်းကတျံရ် ဘိူန်းဖါ်ႈဇိူရ်ႈ အူလီတာနီန်ကပံတ် 1မှီုန်လေႈဖံန်ဟြဲင် ဆာ်မိုႈဆဴင်အိုမ်ပျြံင်ထာတ် ခေဲင်ကီုင်းလာဆေဝ်နီန်မံင်ခ္လ ဘိူည်ငေါႈလိူည်အူလီတာ 5ဟြဲင်လေႈမာ် ဂေါႇမိုႈအီဒေဲႈဇိူရ်ႈဂီုန်း စီပဲန်ဘ်ုပ်ဇံင်းကတျံရ်အူန်းအောႏ။
ဘာည်းလိူည်ကုင်အီဟံရ် တောပ်ပည်မူစယ်၊ အေဲမ်ခြီရ်၊ အိုမ်ငျံရ်၊ အေဲမ်ကိုက် လှံင်အီဂေါည်ခေဲင်ကပီုန်ဆျှံမ်ကဒါႇပိူည်နီန်ကဒါႇဂီုန်း ဂေါႇမိုႈအိုမ်ပျြံင်ထာတ်နီန် ဟည်ကတ်ုတ် စီပဲန်တိုအီးခေဲင်အရာပ်ကဲ ကတူႈအူန်းကီန်းဒည်းအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
