ရွှေဖီမြေ၊ မတ်လ ၂၁ ရက်
ကိုးကန့်ဒေသ လောက်ကိုင်မှာ တွေ့ဆုံဆွေးနွေးခဲ့ကြတဲ့ တအာင်းတပ်- TNLA နဲ့ ကိုးကန့်တပ်-MNDAA တို့အကြား အပစ်အခတ်ရပ်ဖို့ သဘောတူညီချက် ရရှိပြီလို့ တအာင်းတပ်မတော်ရဲ့ သတင်းနဲ့ပြန်ကြားရေး တာဝန်ခံ လွေးယေဦးက ရွှေဖီမြေကို ပြောပါတယ်။
သဘောတူညီချက်မှာ နှစ်ဖက်တပ် နေရာချထားရေး၊ ဖမ်းဆီးထိန်းသိမ်းထားတဲ့ နှစ်ဖက်တပ်သားတွေ ပြန်လွှတ်ပေးရေးနဲ့ နယ်မြေခွဲဝေမှုကိစ္စ ပါဝင်ပြီး ကွတ်ခိုင်မြို့ကို ကိုးကန့်တပ်က ထိန်းချုပ်သွားမယ်လို့ ဆိုပါတယ်။
“ဆွေးနွေးပွဲကတော့ မနေ့က ပြီးသွားပြီ။ ဆွေးနွေးပွဲသွားတဲ့ ကိုယ်စားလှယ်တွေလည်း ပြန်ရောက်ကြပြီ။ အဓိက နှစ်ဖက်တပ် အပစ်ရပ်ဖို့ရယ် မဟာမိတ်အဖြစ် ဆက်လက် ရပ်တည်ဖို့နဲ့ နယ်မြေတွေ တပ်နေရာချထားရေးတွေ သဘောတူနိုင်ခဲ့တယ်” လို့ လွေးယေဦးက ပြောပါတယ်။
လက်ရှိ နှဖက်တပ် ဖမ်းဆီးထားတဲ့ တပ်သားနဲ့ လက်နက်ခဲယမ်းတွေကို စာရင်း ပြုစုထားပြီး ရက်ပိုင်းအတွင်း ပြန်လည် လွှဲပြောင်းပေးဖို့ ရှိတယ်လို့ ဆိုပါတယ်။
နယ်မြေကိစ္စကိုတော့ အတိအကျ ပြောခြင်းမရှိဘဲ သတ်မှတ်ထားတဲ့နေရာ ရောက်မှသာ အတည်ပြုနိုင်မယ်လို့ ဆိုပါတယ်။
ဒါ့အပြင် တအာင်းတပ်နဲ့ကိုးကန့်တပ် မဟာမိတ်အဖြစ် ဆက်လက်ရပ်တည်သွားမယ်လို့ ဆိုပါတယ်။
ကိုးကန့်တပ်ဟာ တအာင်းတပ် ထိန်းချုပ်ထားတဲ့ ကွတ်ခိုင်မြို့အပါအဝင် ပြည်ထောင်စု လမ်းမတစ်လျှောက်က တအာင်းတပ်စခန်းကို တိုက်ခိုက်သိမ်းပိုက်ထားပြီး နမ္မတူနဲ့နမ့်ခမ်းအစပ်မှာလည်း စစ်ရေး ဆိုင်ထားတာတွေ ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
