ရွှေဖီမြေ၊ မတ်လ ၁၉ ရက်၊ လားရှိုး
ကိုးကန့်တပ် ထိန်းချုပ်မှုအောက်မှာ ရှိနေတဲ့ ရှမ်းမြောက် လားရှိုးမြို့နယ် အီနိုင်းကျေးရွာမှာ ပေါက်ကွဲသံတွေ နှစ်ရက်ဆက်တိုက် ကြားနေကြရတာကြောင့် ရွာခံအများစုက စိုက်ပျိုးခြံထဲသို့ ခေတ္တရှောင်နေကြရကြောင်း ရွာခံအမျိုးသမီးရဲ့ ပြောပြချက်အရ သိရပါတယ်။
မနေ့ မတ်လ ၁၈ ရက် မနက်နဲ့ ဒီနေ့ မတ်လ ၁၉ ရက် မနက်ပိုင်း ၈ နာရီဝန်းကျင်မှာ အီနိုင်းရွာထိပ်က တအာင်းတပ် TNLA တပ်စခန်းအနီးမှာ ပေါက်ကွဲသံတွေ ကြားခဲ့ရတာကြောင့် ရွာခံတွေက စိုးရိမ်ပြီး တိမ်းရှောင်ကြတာလို့ ဆိုပါတယ်။
ရွာခံ အမျိုးသမီးက “ပလောင်ဂိတ်ဘက်မှာ ပေါက်ကွဲသံကြားရတာ ဟုတ်တယ်။ ကျမတို့ရွာက ကိုးကန့်နဲ့ ပလောင်ကြားနေရတာ။ တိုက်ပွဲဖြစ်မှာ ကြောက်လို့ တောင်ယာမှာဘဲ တော်တော်များများက ခဏရှောင်နေကြတာပေါ့” လို့ ပြောပါတယ်။
အီနိုင်းကျေးရွာဟာ နမ္မတူ-လားရှိုး လမ်းမပေါ်မှာရှိပြီး တအာင်းတပ် TNLA နဲ့ ကိုးကန့်တပ် MNDAA တပ်တို့ အခြေချ တပ်စွဲထားတဲ့ ကျေးရွာလည်းဖြစ်ပါတယ်။
နောက်ထပ် လားရှိုးမြို့ခံအမျိုးသမီးတစ်ဦးလည်း “ကွတ်ခိုင်ဘက်က တရုတ်နဲ့ ပလောင်ရန်ဖြစ်နေတာ ကြားလို့ ဒီမှာလည်း အဲလိုဖြစ်မှာကြောက်လို့ ရှောင်နေကြတာ။ ပလောင်ကလည်း မြေကတုတ်နဲ့ ကင်းကိုလည်း ရွာထဲ တဖြေးဖြေး တိုးလာတာကြောင့်လည်း ပါလို့လေ” လို့ ပြောပါတယ်။
အဲဒီပေါက်ကွဲသံတွေဟာ ရွာခံတချို့က လက်နက်ကြီးသံလို့ ဆိုကြသလို တချို့ကလည်း မြေမြှုပ်မိုင်း ပေါက်ကွဲသံလို့ ဆိုကြပေမဲ့ ရွှေဖီဖြေက သီးခြားအတည်မပြုနိုင်ပါဘူး။
ကွတ်ခိုင်မြို့ကို ကိုးကန့်တပ်က ဝင်တိုက်ကတည်းကနေ လက်ရှိအချိန်အထိ အီနိုင်းတံတားရှိ ကိုးကန့်တပ်နဲ့ အီနိုင်းရွာအဝင်က တအာင်းတပ် တွေဟာ ခရီးသွားလူထုကို စစ်ဆေးတင်းကြပ်နေသလို ရွာခံတွေကိုလည်း စစ်ဆေးတာ ရှိနေကြောင်း မြို့ခံတွေရဲ့ ပြောပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
