ပို့လဘား၊ မတ်လ ၁၇ ရက်၊ နမ့်ဖတ်ကာ
ကချင်တပ်မတော်- KIA ရဲ့ ထိန်းချုပ်မှုအောက်မှာ ရှိနေတဲ့ ရှမ်းမြောက် ကွတ်ခိုင်မြို့နယ် နမ့်ဖတ်ကာရွာမှာ ညပိုင်း အပြင်မထွက်ဖို့ KIA က ညွှန်ကြားထားကြောင်း ဒေသခံတွေဆီက သိရပါတယ်။
တအာင်းတပ်- TNLA ထိန်းချုပ်တဲ့ ကွတ်ခိုင်မြို့ကို မဟာမိတ်တပ်ဖြစ်တဲ့ ကိုးကန့်တပ်က ဝင်ရောက်တိုက်ခိုက်ပြီးနောက် KIA က ၎င်းထိန်းချုပ်တဲ့ နမ့်ဖတ်ကာရွာမှာ ညပိုင်း အပြင်မထွက်ဖို့ ညွှန်ကြားလာတာပဲ ဖြစ်ပါတယ်။
နမ့်ဖတ်ကာမှာ နေထိုင်တဲ့ အမျိုးသမီးတစ်ဦးက “မနေ့ည အုပ်ချုပ်ရေးတွေရဲ့ လက်အောက်ငယ်သားတွေ လာပြောတာ။ ည ၈ နာရီကစပြီး အပြင်မထွက်နဲ့တဲ့။ ဘာအကြောင်းလဲတော့ သူတို့လည်း မပြောပြဘူး။ သူတို့ပြောတာတော့ အပြင်ထွက်သွားပြီး တခုခုဖြစ်လာခဲ့ရင် တာဝန်မယူနိုင်ဘူးတဲ့။ ဘယ်လက်နက်ကိုင်ဖြစ်ဖြစ် ကိုယ့်ကို လာပစ်သတ်တာ ရှိခဲ့ရင်လည်း တာဝန်မယူပေးနိုင်ဘူး။ လမ်းမှာ တွေ့ရင်လည်း ဖမ်းသွားနိုင်တယ်ပေါ့။ အဲလိုပဲ လာပြောသွားဝာာ” လို့ ရွှေဖီမြေကို ပြောပါတယ်။
KIA ရဲ့ ညွှန်ကြားစာထဲ ဒေသခံတွေအနေနဲ့ စစ်ဝတ်စုံ ဝတ်ဆင်ပြီး သွားလာတာတွေ မပြုလုပ်ဖို့နဲ့ အိမ်တိုင်းမှာ ကတုတ်ကျင်း တူးထားဖို့ သတိပေးထားပါတယ်။
ကျန်းမာရေးနဲ့ပတ်သက်ပြီး အရေးပေါ် သွားလာဖို့ လိုအပ်ရင်လည်း အုပ်ချုပ်ရေးရုံးကို သတင်းပို့ပြီးမှသာ သွားလာကြဖို့ သတိပေး ပြောဆိုထားပါတယ်။
MNDAA က TNLA ဆီကနေ ကွတ်ခိုင်မြို့ကို သိမ်းယူလိုက်ပြီးနောက် မူဆယ်-လားရှိုး လမ်းမပေါ်က KIA ဂိတ်တွေကိုလည်း ဂိတ်များတယ်ဆိုတဲ့ အကြောင်းပြချက်နဲ့ မနေ့ မတ်လ ၁၆ ရက် နေ့လယ်ပိုင်းကစ ဖယ်ရှားပေးဖို့ MNDAA ဘက်က ပြောဆိုတာတွေ ရှိခဲ့ပါတယ်။
ပြီးခဲ့တဲ့ မတ်လ ၁၄ ရက် မနက်ပိုင်းကစပြီး ကွတ်ခိုင်မြို့အပါအဝင် မူဆယ်မြို့ ၁၀၅ မိုင်၊ နမ့်ဖတ်ကာ၊ မုံစီး စတဲ့နေရာ ၅ ခုထက်မနည်းက TNLA ရဲ့ တပ်စခန်းတွေကို ကိုးကန့်တပ်က အင်အားထောင်ချီ အသုံးပြုပြီး ထိုးစစ်ဆင် တိုက်ခိုက်ခဲ့ရာ မတ်လ ၁၅ ရက်မှာ ကွတ်ခိုင်မြို့တစ်ခုလုံးကို ထိန်းချုပ်ခဲ့တာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
