ပို့လဘား၊ မတ်လ ၁၆ ရက်
ရှမ်းမြောက် ကွတ်ခိုင်မြို့နယ် နမ့်ဖတ်ကာကျေးရွာနဲ့ မူဆယ်မြို့နယ် ၁၀၅ မိုင် ပြည်ထောင်စုလမ်းမပေါ်ရှိ တအာင်းကျေးရွာက ရွာသူကြီးတွေကို MNDAA တပ်က အစည်းအဝေးခေါ်ပြီး ဒေသခံတွေကို ဓာတ်ပုံလာရိုက်ဖို့ ပြောဆိုသွားပြီး မှတ်တမ်းထဲပါမှာသာ ပြည်ထောင်စုလမ်းမပေါ် ဖြတ်သန်းသွားလာခွင့်ပြုပေးမယ်လို့ ဒေသခံတွေက ပြောပါတယ်။
မနေ့ မတ်လ ၁၅ ရက် မနက် ၉ နာရီ ဝန်းကျင်ကစပြီး ၁၀၅ မိုင်ထဲ ကား၊ ဆိုင်ကယ် အဝင်အထွက်တွေကို MNDAAက ဒီနေ့ မတ်လ ၁၆ ရက်အထိ ဖြတ်သန်းသွားလာခွင့်ပိတ်ပင်ထားပေမယ့် အသွားအလာအချို့ကတော့ ရှိတယ်လို့ ဆိုပါတယ်။
“နမ့်အွန်၊ ခိုမုန်း၊ ဆိုင်ခါဝ်ဘက်က လူတွေကို ကိုးကန့်က ဓာတ်ပုံလာရိုက်ခိုင်းတာ။သူတို့ရိုက်ထားတဲ့ ဓာတ်ပုံထဲမှာ ကိုယ့်ပုံပါမှ သူတို့ပေးဖြတ်တာတဲ့။ အိမ်တိုင်းလိုလို မိသားစုအလိုက်နဲ့ ဓာတ်ပုံလာရိုက်ဖို့ ပြောတယ်။ အဲဓာတ်ပုံမှတ်တမ်းထဲမှာ ကိုယ်တွေမပါဘူးဆိုရင် ကျေးရွာထဲတွေ့တာနဲ့ ဖမ်းပြီး ထောင်ဒဏ်ပေးမယ်”
အဆိုပါ ကျေးရွာတွေက ဒေသခံတွေဟာ TNLA ထံ တာဝန်ထမ်းဆောင်သူရှိမရှိ မေးမြန်းတာနဲ့ တာဝန်ထမ်းဆောင်သူရှိရင် အဲလူတွေရဲ့ စာရင်းတွေနဲ့ လက်နက်တွေ လာအပ်ပေးဖို့ ပြောဆိုကြောင်း အထက်ပါအမျိုးသားက ပြောပါတယ်။
“တအာင်းတပ်သားဖြစ်တဲ့သူဆိုရင် သူတို့ဆီကို လက်နက်အပ်ခိုင်းထားပါတယ်။ လက်နက်အပ်ရင် သူတို့ ဘာမှမလုပ်ဘူးဆိုပြီးပြောပါတယ်”
ဒါ့အပြင် ညီနောင်မဟာမိတ် ၃ ဖွဲ့ဖြစ်တဲ့ အာရက္ခတပ်တော်(AA)၊တအာင်းတပ်(TNLA)နဲ့ကိုးကန့်တပ် (MNDAA)တို့ ပူးပေါင်းတိုက်ယူထားပြီး အုပ်ချုပ်ထားတဲ့နေရာအားလုံးက တအာင်းတပ်အလံကို ကိုးကန့်တပ်က ဖြုတ်ယူသွားပြီး ၎င်းတို့အလံကို ထောင်လိုက်ကြောင်း အဆိုပါအမျိုးသားက ပြောပါတယ်။
အဆိုပါ နမ့်ဖတ်ကာနဲ့ ၁၀၅ မိုင်ကြားရှိ တအာင်းကျေးရွာက ဒေသခံတွေကိုလည်း ကိုးကန့်တပ်က တအာင်းတပ်နဲ့ ဆက်စပ်သူတွေအားလုံး ဖမ်းဆီးသွားခဲ့တာ ရှိပါတယ်။
ကိုးကန့်တပ်ဟာ ကွတ်ခိုင်-မူဆယ် ပြည်ထောင်စုလမ်းမကြီးတစ်လျှောက် တအာင်းတပ်အကုန်လုံးကို ဖယ်ရှားခဲ့ပြီး လမ်းတစ်လျှောက်က တအာင်းရွာထဲကိုလည်း ဝင်ရောက်ပြီး တအာင်းတပ်နဲ့ မဆက်သွယ်ဖို့ ခေါ်ယူသတိပေးနေတာတွေလည်း ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
