မိုင်းရူပ၊ မတ်လ ၁၁ ရက်၊ မိုးမိတ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် မိုးမိတ်မြို့မှာလည်း စက်သုံးဆီ တစ်လီတာကို တစ်သောင်းခွဲအထိ ဈေးမြှင့်တက်လာတယ်လို့ ဒေသခံတွေက ရွှေဖီမြေကို ပြောပါတယ်။
ပန့်ဆီဆိုင်တွေမှာ စက်သုံးဆီ တစ်လီတာကို တစ်သောင်းကျပ်အထိရှိပြီး စက်သုံးဆီရဖို့ မြို့ခံတွေ တန်းစီစောင့်ဆိုင်းနေရကာ အပြင်ဆိုင်တွေမှာတော့ ဆီတစ်လီတာကို တစ်သောင်းခွဲအထိ ပေးဝယ်နေရတယ်လို့ မိုးမိတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“အပြင်မှာ တစ်လီတာကို တစ်သောင်းခွဲ ပေးဝယ်ရတယ်။ ပန့်ဆိုင်မှာက ဆိုင်ကယ်တစ်စီး တစ်သောင်းဖိုးဘဲ ထည့်ပေးတယ်။ တစ်သောင်းဖိုးက တစ်လီတာ နည်းနည်းဘဲ ကျော်တယ်”
မိုးမိတ်မြို့မှာ စစ်ကောင်စီဘက်က အုပ်ချုပ်ရေး မလည်ပတ်နိုင်သေးတာကြောင့် ကား၊ ဆိုင်ကယ် မောင်းနှင်ဖို့ ကားနံပါတ် စုံ မ ခွဲထားတာ မရှိဘူးလို့လည်း ၎င်းက ဆက်ပြောပါတယ်။
မိုးမိတ်မြို့အပြင် ရှမ်းမြောက်က မြို့နယ်တွေမှာ စက်သုံးဆီဈေး အဆမတန် မြှင့်တက်နေပြီး စက်သုံးဆီကို လိုသလောက် ဝယ်ယူလို့ မရတာတွေ ကြုံနေကြရတယ်လို့ ဒေသခံတွေက ပြောပါတယ်။
စစ်ကောင်စီဘက်က ဆီပြတ်လပ်မှု မရှိအောင် ဆောင်ရွက်နေတယ်လို့ ပြောဆိုထားပေမဲ့ မြေပြင်မှာတော့ စက်သုံးဆီ ပြတ်လပ်မှုနဲ့ ဈေးအဆမတန် ကြီးမြှင့်မှုဒဏ်ကို ကြုံနေကြရပါတယ်။
အီရန်၊ အစ္စရေးနဲ့ အမေရိကန်တို့ရဲ့ စစ်ရေး တင်းမာမှုကြောင့် ကမ္ဘာ့စက်သုံးဆီ သယ်ယူပို့ဆောင်ရေး ကန့်သတ်ခံရပြီးနောက် မြန်မာအပါအဝင် နိုင်ငံအများစုမှာ စက်သုံးဆီကို အကန့်အသတ်နဲ့သာ ရောင်းချနေကြတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
