မိုင်းပန်ပျော်၊ ဇန်နဝါရီ ၂၂ ရက်၊ မူဆယ်
တရုတ်-မြန်မာနယ်စပ် မူဆယ်မြို့မှာရှိတဲ့ပြည်သူ့စစ်အချင်းချင်း မူးယစ်ဆေးဝါး အသုံးလွန်ပြီး ပစ်ခတ်မှု ဖြစ်ပွားရာကနေ ပြည်သူ့စစ်တစ်ဦး သေဆုံးခဲ့တယ်လို့ စုံစမ်းသိရှိရပါတယ်။
ဖြစ်စဉ်ဟာ ပြီးခဲ့တဲ့ ဇန်နဝါရီ ၁၉ ရက် ညနေပိုင်းက မူဆယ်မြို့ တော်ရွက်ရပ်ကွက်မှာ စစ်ကောင်စီ လက်အောက်ခံ မန်ပြိန်းပြည်သူ့စစ်အဖွဲ့ဝင်အချင်းချင်းက မူးယစ်ဆေးဝါး အသုံးလွန်ပြီး ပစ်ခတ်မှု ဖြစ်ပွားရာ ပြည်သူ့စစ်တစ်ဦး သေဆုံးခဲ့တယ်လို့ မူဆယ်ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“ဆေးကြောင်တယ်ထင်တယ်။ ဆေးကြောင်ပြီဆိုရင် သိတဲ့အတိုင်းဘဲလေ လူတွေက ကြောင်ပြီလေ။ အဲဒါနဲ့ သူတို့အချင်းချင်း ပြန်ပစ်ကြတာ။ တစ်ယောက် သေသွားတယ်”
ပစ်ခတ်မှု ကျူးလွန်တဲ့သူကို စစ်ကောင်စီက ဖမ်းဆီးထိန်းသိမ်းထားတယ်လို့ ၎င်းက ဆက်ပြောပါတယ်။
ပြီးခဲ့တဲ့ ၂၀၂၄ ဒီဇင်ဘာလအတွင်းမှာလည်း ပြည်သူ့စစ်အချင်းချင်း စကားများပြီး ပစ်ခတ်မှု ဖြစ်ပွားတာကြောင့် ဒဏ်ရာရသူ ရှိခဲ့ပါတယ်။
မူဆယ်မှာ စစ်ကောင်စီအပြင် ၎င်းရဲ့လက်အောက်ခံ ပြည်သူ့စစ်အဖွဲ့အများစု ရှိနေပြီး အဲဒီပြည်သူ့စစ်တွေဟာ ကျားဖြန်၊လောင်းကစားရုံ၊ မူးယစ်ဆေးဝါးနဲ့ ပြည့်တန်ဆာရုံတွေကို ကိုယ်စီ ပိုင်ဆိုင်ထားကြပြီး စစ်တပ်ထံ အခွန် ပေးဆောင်နေကြပါတယ်။
အချင်းချင်း ပစ်ခတ်မှုနဲ့ ရန်ပွဲလည်း မကြာခဏ ဖြစ်ပွားနေပြီး စစ်ကောင်စီဘက်က ကြားဝင်ကာ ဖြေရှင်းနေရတာတွေ ရှိတယ်လို့ သတင်းရင်းမြစ်တစ်ဦးက ရွှေဖီမြေကို ပြောပါတယ်။
