မိုင်းရူပ၊ မတ်လ ၈ ရက်
တအာင်းတပ်မတော်- PSLF/TNLA ထိန်းချုပ်ထားတဲ့ ကွတ်ခိုင်မြို့နဲ့ ကိုးကန့်တပ်- MNDAA ထိန်းချုပ်ထားတဲ့ သိန္နီလမ်းကို အဆင်းသာ ခွင့်ပြုပြီး သိန္နီကနေ ကွတ်ခိုင်ဘက် တက်လာတဲ့ ယာဉ်တွေကိုတော့ ကိုးကန့်တပ်ဘက်က ဖြတ်သန်းခွင့် မပေးတော့ဘူးလို့ ကားသမားတွေက ရွှေဖီမြေကို ပြောပါတယ်။
သိန္နီ-ကွတ်ခိုင် လမ်းပိုင်းကို မနက်ဖြန် မတ်လ ၉ ရက်ကစပြီး ကွတ်ခိုင်ကနေ သိန္နီဘက် ဆင်းလာတဲ့ ယာဉ်တွေကိုသာ ဖြတ်သန်းခွင့် ပြုမှာဖြစ်ပြီး သိန္နီကနေ ကွတ်ခိုင်ဘက် တက်လာတဲ့ ယာဉ်တွေကို ကိုးကန့်တပ်က ပိတ်ထားမယ်လို့ ပြောဆိုထားကြောင်း ကားသမားတစ်ဦးက ရွှေဖီမြေကို ပြောပါတယ်။
“အဆင်းတော့ ရတယ်တဲ့။ အတက်ကားတွေတော့ ဘာမှ မတင်လည်း ပေးမဖြတ်ဘူးတဲ့။ ကွတ်ခိုင်-သိန္နီကြား မန်ပြိန်းရွာ နတ်စင်မှာ စောင့်နေတဲ့ ကိုးကန့်စစ်သားတွေက ကားသမားတွေကို အဲလိုပြောတာ”
သိန္နီ-ကွတ်ခိုင် လမ်းပိုင်းကို ဘယ်နှစ်ရက်ကြာ ပိတ်မယ်ဆိုတာနဲ့ ဘာကြောင့် ပိတ်လဲဆိုတာကိုတော့ ကိုးကန့်တပ်ဘက်က ပြောဆိုတာ မရှိဘူးလို့ ၎င်းက ဆက်ပြောပါတယ်။
ကွတ်ခိုင်မြို့မှာ TNLA နဲ့ ကိုးကန့်တပ်အကြား တင်းမာမှု ဖြစ်ပွားပြီးနောက် တအာင်းတပ် ထိန်းချုပ်ဒေသဘက် စက်သုံးဆီအပါအဝင် ကုန်ပစ္စည်း သယ်ယူခွင့်ကို ကိုးကန့်တပ်ဘက်က ကန့်သတ်ခဲ့တာပဲ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၁၃ ရက် ညနေပိုင်းမှာ တအာင်းတပ် ထိန်းချုပ်ထားတဲ့ ကွတ်ခိုင်မြို့ပေါ် MNDAA တပ်ဆင်ထားတဲ့ CCTV တွေကို လိုက်ဖြုတ်ရာကနေ နှစ်ဖက်တပ် ထိုးကြိတ်မှု ဖြစ်ပွားခဲ့ရာကနေ လက်ရှိအချိန်ထိ ပြေလည်မှု မရသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
